গিৰিজানন্দ চৌধুৰী বিশ্ববিদ্যালয়ে ৮ ফেব্ৰুৱাৰী ২০২৫ তাৰিখে জি প্লাচৰ সহযোগত “হাফ মাৰাথন” প্ৰতিযোগিতা অনুষ্ঠিত কৰাৰ কথা ঘোষণা কৰিছে l নান্দনিক সৌন্দৰ্যৰে ভৰপূৰ দীপৰ বিল আৰু পশ্চিম গুৱাহাটী এলেকাৰ পৰা ৰাতিপুৱা ৪ বজাত আৰম্ভ হ’বলগীয়া এই মাৰাথন দৌৰ প্ৰতিযোগিতাত অংশগ্ৰহণকাৰীসকলে প্ৰায় ১৩ কিলমিটাৰ পথ অতিক্ৰম কৰিব লাগিব l
মাৰাথন দৌৰৰ বাবে বিশ্ববিদ্যালয়ৰ চৌহদৰ পৰা আৰম্ভ কৰি ধাৰাপুৰ চাৰিআলিৰ মাজেৰে গৈ ভি আই পি চক হৈ পুনৰ বিশ্ববিদ্যালয় চৌহদলৈ উভতি অহাৰ সুন্দৰ পথচোৱা ধাৰ্য্য কৰা হৈছে। জি প্লাচ, নৰ্থ ইষ্ট নাও আৰু ৯২.৭ বিগ এফ এম হৈছে “হাফ মাৰাথন”ৰ অফিচিয়েল মিডিয়া পাৰ্টনাৰ।
প্ৰতিযোগিতাত শীৰ্ষস্থান লাভ কৰাজনক বিশ্ববিদ্যালয়ে নগদ ৫০ হেজাৰ টকা পৰ্যন্ত আকৰ্ষণীয় পুৰস্কাৰ প্ৰদান কৰাৰ সিদ্ধান্ত লৈছে । উক্ত প্ৰতিযোগিতাৰ বাবে ইচ্ছুক অংশগ্ৰহণকাৰীসকলক আগতীয়াকৈ নিজৰ নাম পঞ্জীয়ন কৰি প্ৰতিযোগিতাত অংশ ল’বলৈ অনুৰোধ কৰা হৈছে। পঞ্জীয়নৰ বাবে তেওঁলোকে অধ্যাপক হিমাংশু শেখৰ ব্ৰহ্মক (ফোন: ৮৪৭২০৪২৭৭২) যোগাযোগ কৰিব পাৰিব।
এই “হাফ মাৰাথন” হৈছে ৫ মাৰ্চৰ পৰা ৮ মাৰ্চ, ২০২৫ লৈ অনুষ্ঠিত হ’বলগীয়া গিৰিজানন্দ চৌধুৰী বিশ্ববিদ্যালয়ৰ বাৰ্ষিক উৎসৱ “ইউফুজিম ২০২৫ ৰ আৰম্ভণি উৎসৱ। ৫ মাৰ্চৰ পৰা ৮ মাৰ্চ ২০২৫ লৈকে অনুষ্ঠিত হ’বলগীয়া ” ইউফুজিম ২০২৫” ত গিৰিজানন্দ চৌধুৰী বিশ্ববিদ্যালয় চৌহদ ছাত্ৰ ছাত্ৰীসকলৰ প্ৰতিভা প্ৰদৰ্শন, সংগীত, নৃত্য, নাটক ইত্যাদিকে ধৰি বাৰে ৰহৰীয়া সাংস্কৃতিক অনুষ্ঠান, বিভিন্ন প্ৰতিযোগিতা, বিনোদনমূলক অনুষ্ঠান, খাদ্যৰ ষ্টল ইত্যাদিকে ধৰি এক ব্যস্ত আৰু উৎসৱমুখৰ পৰিৱেশলৈ ৰূপান্তৰিত হ’ব l সেই উৎসৱমুখৰ পৰিৱেশৰ অংশীদাৰ হ’বলৈ সকলোৰে উপস্থিতি কামনা কৰিছে আয়োজক কৰ্তৃপক্ষই l
