অসমৰ শৈক্ষিক ক্ষেত্ৰখনৰ বাবে সুখবৰ। ভাৰত চৰকাৰে শেহতীয়াকৈ গিৰিজানন্দ চৌধুৰী বিশ্ববিদ্যালয়ৰ স্কুল অৱ এলাইড হেল্থ চাইন্সৰ অধ্যাপিকা ড০ বিদ্যা শ্ৰীনিবাসনক ৰাষ্ট্ৰীয় চিকিৎসা পৰীক্ষাগাৰ আৰু জীৱবিজ্ঞান পেছাদাৰী পৰিষদৰ পাঁচজন সদস্যৰ ভিতৰত এজন অন্যতম সদস্য হিচাপে মনোনীত কৰা হৈছে। ২০২৫ চনৰ ২৬ মাৰ্চত ‘National Commission for Allied and Healthcare Professions’-ৰ বাবে ৰাষ্ট্ৰীয় আয়োগে গঠন কৰা এই পৰিষদখনত স্থান লাভ কৰাটো ভাৰতৰ স্বাস্থ্যসেৱা পেছাদাৰীসকলৰ বাবে এক বিৰল কৃতিত্ব। এই সন্মান বিশিষ্ট ব্যক্তিসকলক জীৱবিজ্ঞানৰ ক্ষেত্ৰখনলৈ আগবঢ়োৱা অৱদানৰ বাবে প্ৰদান কৰা হয়।
এনচিএএইচপি হৈছে সমগ্ৰ দেশৰ স্বাস্থ্যসেৱা পেছাদাৰীসকলৰ বাবে শীৰ্ষতম নিয়ন্ত্ৰণকাৰী সংস্থা আৰু এই সংস্থাটোৱে ভাৰত চৰকাৰৰ স্বাস্থ্য আৰু পৰিয়াল কল্যাণ মন্ত্ৰালয়ৰ তত্বাৱধানত কাৰ্য সম্পাদন কৰে। ২০২১ চনত স্থাপিত এনচিএএইচপিয়ে স্বাস্থ্যসেৱা বৃত্তিত শিক্ষা আৰু গৱেষণা নিয়ন্ত্ৰণ, কেন্দ্ৰীয় নীতিসমূহৰ অনুসৰণ, পাঠ্যক্ৰম প্ৰণয়ন আৰু পৰীক্ষাৰ বাবে মানদণ্ড নিৰ্ধাৰণৰ দিশ চোৱা-চিতা কৰে। এনচিএএইচপিয়ে গঠন কৰা এনে দহটা পেছাদাৰী পৰিষদৰ ভিতৰত নৱগঠিত চিকিৎসা পৰীক্ষাগাৰ আৰু জীৱবিজ্ঞান পেছাদাৰী পৰিষদ অন্যতম।
উল্লেখ্য যে, ড০ বিদ্যা শ্ৰীনিবাসনে পিলানীস্থিত বিৰলা ইনষ্টিটিউট অৱ টেকন’লজী এণ্ড ছায়েন্সৰ পৰা মেডিকেল লেবৰেটৰী টেকন’লজীত এম এছ আৰু বায়’লজীকেল ছায়েন্সত পিএইচডি সম্পূৰ্ণ কৰে।তেখেতে ড° ৰাধাকৃষ্ণণ বঁটা, বিএছ নৰসিংহ ৰাও বঁটা, নেচনেল এছিয়া আৰভো ট্ৰেভেল গ্ৰাণ্ট, উইপ্ৰ’ বায়’মেড প্ৰাইভেট লিমিটেড এনডাউমেণ্ট বঁটা, ডাঃ এছ ৰামাস্বামী বঁটাৰ লগতে শৈক্ষিক উৎকৰ্ষতাৰ বাবে নৰসিংহন এনডাউমেণ্ট বঁটাও লাভ কৰিছে। ড০ বিদ্যা শ্ৰীনিবাসনৰ এলাইড হেল্থ ছায়েন্সৰ ক্ষেত্ৰত যথেষ্ট অভিজ্ঞ কেৰিয়াৰ আছে। আঠাইশ বছৰৰো অধিক সময় পেছাদাৰী অভিজ্ঞতাৰে ড০ শ্ৰীনিবাসনে অসংখ্য স্বাস্থ্য শিবিৰ, সজাগতা কাৰ্যসূচী আৰু কৰ্মশালা আদি আয়োজন কৰি পাঠদান, গৱেষণা আৰু স্বাস্থ্য-নিদানৰ ওপৰত গুৰুত্বৰ দি জনসেৱা আগবঢ়াই আহিছে। ড০ শ্ৰীনিবাসনে বিভিন্ন আলোচনীত তেৰখন গৱেষণা পত্ৰ প্ৰকাশ কৰিছে আৰু চাৰিখন পাঠ্যপুথি ৰচনা কৰিছে: সেইকেইখন ক্ৰমে- হেণ্ডবুক অফ প্ৰেক্টিকেল হিমাটোলজী (২০২০), হেণ্ডবুক অফ প্ৰেক্টিকেল মাইক্ৰ’বায়োলজী (২০২১), হস্পিটেল এণ্ড পেচেণ্ট কেয়াৰ মেনেজমেণ্ট (২০২২) আৰু এচেন্সিয়েলছ অৱ প্ৰেক্টিকেল বায়োকেমিষ্ট্ৰী (২০২৪) অন্যতম। তেখেতৰ গৱেষণাই বিশেষভাৱে অসংক্ৰামক ৰোগ, যেনে মেদবহুলতা, মধুমেহ আৰু কৰ্কট ৰোগৰ ওপৰত গুৰুত্ব দিয়ে।
ভাৰত চৰকাৰৰ স্বাস্থ্য আৰু পৰিয়াল কল্যাণ মন্ত্ৰালয়ৰ দ্বাৰা মেডিকেল লেব টেকন’লজীছ (এমএলটি) পাঠ্যক্ৰম উন্নয়ন কৰ্মশালাৰ ৱৰ্কিং গ্ৰুপ এক্সপাৰ্টৰ বাবেও ড০ শ্ৰীনিবাসনক উত্তৰ-পূবৰ পৰা প্ৰতিনিধি হিচাপে নিৰ্বাচিত কৰা হয়। শ্ৰীমন্ত শংকৰদেৱ স্বাস্থ্য বিজ্ঞান বিশ্ববিদ্যালয়ৰ লগতে উত্তৰ-পূৰ্বাঞ্চলৰ আন দুখন বিশ্ববিদ্যালয়ৰ বাবেও এমএলটি পাঠ্যক্ৰমৰ পাঠ্যক্ৰম প্ৰস্তুত কৰাত (ডিপ্লমা, ইউ জি আৰু পি জি পৰ্যায়ত) ড০ শ্ৰীনিৱাসন এগৰাকী অগ্ৰগণ্য ব্যক্তি।
