এজনী ১৫ বছৰীয়া ছোৱালীয়ে ইয়াৰফোন কেবলেৰে (earphone cable) ডিঙি চেপি হত্যা কৰিলে নিজৰ ৯ বছৰীয়া ভায়েকক।
উত্তৰ প্ৰদেশৰ ৰায়বেৰেলী জিলাত সংঘটিত হৈছে এই শিহৰণকাৰী হত্যাকাণ্ড।
বাতৰি অনুসৰি, ছোৱালীজনীয়ে তাইৰ মোবাইল ফোনত এজন বন্ধুৰ স’তে বাৰ্তালাপ কৰি থকাৰ বাবে ভায়েকে আপত্তি দৰ্শায়।
যাৰ ফলত ধৈৰ্যচ্যুতি ঘটি ছোৱালীজনীয়ে ভায়েকক ডিঙি চেপি মাৰে।
ঘটনাটো সংঘটিত হৈছিল যোৱা সপ্তাহৰ বৃহস্পতিবাৰেই কিন্তু পোহৰলৈ আহে সোমবাৰে।
ছোৱালীজনীক মঙলবাৰে আৰক্ষীয়ে আটক কৰি কিশোৰ গৃহলৈ পঠিয়াই দিয়ে।
আৰক্ষীৰ ভাষ্য অনুসৰি, ঘৰত পিতৃ-মাতৃ নথকাৰ অৱস্থাত ছোৱালীজনীয়ে ঘণ্টা ঘণ্টাজুৰি মোবাইল ফোনত সময় পাৰ কৰে।
ভায়েকে কথাটো কিছুদিন পূৰ্বে পিতৃ-মাতৃক জনাইছিল, যাৰ ফলত ছোৱালীজনী ঘৰত গালি-গালাজৰ সম্মুখীন হৈছিল।
বৃহস্পতিবাৰে ঘৰত পিতৃ-মাতৃ নথকা অৱস্থাত পুনৰ তাই মোবাইলত বন্ধুজনৰ স’তে কথা পাতিব ধৰে আৰু ভায়েকে আপত্তি প্ৰদৰ্শন কৰে।
এজন আৰক্ষী বিষয়াৰ ভাষ্য অনুসৰি ভায়েকে আপত্তি প্ৰদৰ্শন কৰাৰ পাছতে দুয়োৰে মাজত সংঘাত হয়, ভায়েকে বায়েকক আক্ৰমণ কৰিবলৈ অগ্ৰসৰ হয়, কিন্তু অৱশেষত বায়েকে তাক ইয়াৰফোনেৰে ডিঙি চেপি হত্যা কৰে।
হত্যা কৰাৰ পাছত ৯ বছৰীয়া ল’ৰাটোক ঘৰত নাপাই মাক-দেউতাকক আৰক্ষীক খবৰ দিয়ে আৰু বিচাৰ খোচাৰ কৰে।
পাছদিনা, ঘৰৰ এটা গুদাম ঘৰৰ পৰা দুৰ্গন্ধ বিয়পি আহে আৰু যেতিয়া গুদামৰ দোৱাৰ খোলা হয়, ল’ৰাটোৰ মৃতদেহটো পোৱা যায়।
মৃতদেহটোৰ পেট, ডিঙি, হাতত আঘাতৰ চিন পোৱা গৈছে।
লগালগ দেউতাকে সন্দেহবসতঃ এজন চুবুৰীয়া লোকৰ ওপৰত এজাহাৰ দাখিল কৰে।
লোকজনক আৰক্ষীয়ে আটক কৰে।
অনুসন্ধানকালত পোৱা যায় যে ঘটনাটো সংঘটিত হোৱাৰ সময়ত চুবুৰীয়া লোকজন সেই স্থানত নাছিলেই।
তাৰপাছত ল’ৰাটোৰ বায়েকক যেতিয়া মাক-দেউতাক আৰু শিশু কল্যান বিষয়াৰ উপস্থিতিত আৰক্ষীয়ে জেৰা কৰে, তাই নিজৰ অপৰাধ স্বীকাৰ কৰি কয় যে তাই ভায়েকক হত্যা কৰিব বিচৰা নাছিল।
