‘লেতেৰা কাপোৰ’ পিন্ধা যুৱতী শূৰ্পনাখাৰ দৰে! বিজেপি নেতাৰ উদ্ভট মন্তব্য
চূড়ান্ত নাৰী বিদ্বেষী মন্তব্যৰে পুনৰ এবাৰ চৰ্চালৈ আহিছে দেশৰ শাসকীয় বিজেপি দলৰ এগৰাকী জ্যেষ্ঠ নেতা। দলটোৰ ৰাষ্ট্ৰীয় সাধাৰণ সম্পাদকৰ দৰে গুৰুত্বপূৰ্ণ পদবীত থকা কৈলাশ বিজয়বৰ্গিয়াৰ মতে ‘লেতেৰা কাপোৰ’ পৰিধান কৰা যুৱতীসকল ভাৰতীয় মহাকাব্য ৰামায়ণৰ চৰিত্ৰ ‘শূৰ্পনাখা’ৰ দৰে।
হনুমান আৰু মহাবীৰৰ জন্ম জয়ন্তী উপলক্ষে বৃহস্পতিবাৰে ইন্দোৰত আয়োজিত এক ধৰ্মীয় অনুষ্ঠানত এই উদ্ভট মন্তব্য কৰিছে বিজেপিৰ নেতাগৰাকীয়ে। কেৱল সিমানেই নহয়, নিশা মদ্যপান কৰা যুৱক-যুৱতীসকলক চৰ সোধোৱাৰো ইচ্ছা প্ৰকাশ কৰে বিজয়বৰ্গিয়াই।
তেওঁ কয়, “ভগৱানৰ শপত খাই কৈছো, যেতিয়া মই নিশা ওলাই যাওঁ আৰু যুৱক-যুৱতীসকলক মদ্যপান কৰা দেখিবলৈ পাওঁ, তেতিয়া তেওঁলোকক সচেতন কৰিবলৈ পাঁচ-সাতটা চৰ শোধাবলৈ মন যায়।”
“আমি নাৰীক দেৱী বুলি ভাবো; কিন্তু ছোৱালীবোৰে এনেকুৱা কিছুমান লেতেৰা কাপোৰ পিন্ধে যে সিহঁতৰ ক্ষেত্ৰত সেই ধাৰণাৰ কোনো অৱকাশেই নাথাকে। দেখাত শূৰ্পনাখাৰ দৰে।”— কৈলাশ বিজয়বৰ্গিয়াই লগতে কয়।
তেওঁ লগতে যুৱতীসকলক ‘ভাল কাপোৰ’ পিন্ধিবলৈও পৰামৰ্শ দিয়ে। তেওঁৰ মতে, “ভগৱানে তোমাক ভাল শৰীৰ দিছে, ভাল কাপোৰ পিন্ধা।” বিজয়বৰ্গিয়া এনে কথাত খুবেই চিন্তিত বুলি উল্লেখ কৰি অভিভাৱকসকলক সন্তানক এই বিষয়ে ভালকৈ শিকাবলৈও উপদেশ দিয়ে।
BJP Leader @KailashOnline says girls dress badly & look like ‘Shurpanakha’. This is a reprehensible & demeaning insult to every woman of this country
Where is @smritiirani now? Does she condone this disgusting statement? Or does she only find her voice to attack @RahulGandhi! pic.twitter.com/hzoxrnZpl1
— Dr. Shama Mohamed (@drshamamohd) April 8, 2023
বিজয়বৰ্গিয়াৰ এই আজৱ মন্তব্যৰ পাছতে তীব্ৰ প্ৰতিক্ৰিয়াৰ সৃষ্টি হৈছে। বিৰোধী নেতাৰ লগতে সামাজিক মাধ্যম ব্যৱহাৰকাৰী সকলৰ পৰাও নাৰীবিদ্বেষী আৰু মৰেল পুলিচিঙৰ অভিযোগত ক্ষুৰধাৰ সমালোচনাৰ সন্মুখীন হৈছে নেতাগৰাকী।
কংগ্ৰেছৰ মুখপাত্ৰ সংগীতা শৰ্মাই কয়, “বিজেপি নেতাই বাৰে বাৰে নাৰীক অপমান কৰে। ইয়াৰ দ্বাৰা তেওঁলোকৰ চিন্তাধাৰা আৰু তেওঁলোকৰ মনোভাৱ প্ৰকাশ পায়।” নাৰীৰ সাজ-পোছাকৰ ওপৰত কৈলাশ বিজয়বৰ্গীয়াৰ এনে আপত্তিজনক মন্তব্যৰ বাবে বিজেপিক ক্ষমা খুজিবলৈও তেওঁ দাবী জনায়।