গহপুৰ পৌৰসভা আৰু অসম ৰাজ্যিক নগৰীয়া জীৱিকা অভিযানে মহিলা আত্মসহায়ক গোটৰ লগতে ক্ষেত্ৰভিত্তিক সংঘলৈ আগবঢ়োৱা চাৰু আৰু কাৰু শিল্পৰ গ্ৰীষ্মকালীন বিনামূলীয়া প্ৰশিক্ষণৰ পৰহি অন্ত পৰে।
গহপুৰ পৌৰসভাৰ প্ৰেক্ষাগৃহত তিনিদিনীয়া কাৰ্যসূচীৰে গৃহিণীসকলৰ বাবে প্ৰদান কৰা উক্ত প্ৰশিক্ষণ শিবিৰ মুকলি কৰে গহপুৰ পৌৰসভাৰ কাৰ্যবাহী বিষয়া নমিতা বৰাই।
নিৰ্বাচিত বিভিন্ন গোটৰ শতাধিক প্ৰশিক্ষাৰ্থীক স্ক্ৰীণ প্ৰিণ্টিং, ফেব্ৰিক ডিজাইনিং আৰু পেলনীয়া বস্তুৰ পৰা ঘৰ সজোৱা সামগ্ৰী নিৰ্মানৰ প্ৰশিক্ষণ প্ৰদান কৰে লখিমপুৰ শিমলুগুৰিৰ চিত্ৰকলা প্ৰশিক্ষক যুতি বুঢ়াগোহাঁইয়ে।
অসম ৰাজ্যিক নগৰীয়া জীৱিকা অভিযানৰ সামূহিক সংগঠক কিৰণ দেৱনাথে আঁত ধৰা প্ৰশিক্ষণৰ সামৰণি কাৰ্যসূচীত গহপুৰ পৌৰসভাৰ সভাপতি অতুল বৰা, কাৰ্যবাহী বিষয়া নমিতা বৰা, বিশ্বনাথ চাৰিআলি নগৰীয়া জীৱিকা অভিযানৰ নগৰ প্ৰকল্প প্ৰৱন্ধক ড° অঞ্জনজ্যোতি বৰাই প্ৰশিক্ষাৰ্থীসকলক উদ্দেশ্যি মহিলাসৱলীকৰণৰ বিস্তৃত ভাষণ আগবঢ়াই সকলোকে উৎসাহিত কৰে।
সামৰণি কাৰ্যসূচীত গহপুৰ পৌৰসভাৰ উপ-সভাপতি পুটুমাই মুদৈ হাজৰিকা, ৫ নং ৱাৰ্ড কমিছনাৰ মুকুট ভূঞা, সামূহিক সমল ব্যক্তি নিৰ্মালি বৰদলৈ, কবিতা দাস, সহ:প্ৰশিক্ষক প্ৰিয়া গগৈ বুঢ়াগোঁহাই আৰু শিক্ষক-ফটোগ্ৰাফাৰ সঞ্জীৱ বসুমতাৰী উপস্থিত থাকে। উল্লেখ্য যে পষেক আগে নগৰ প্ৰকল্প প্ৰৱন্ধক ড° অঞ্জনজ্যোতি বৰাৰ তত্ত্বাৱধানত বিশ্বনাথ চাৰিআলিতো এই প্ৰশিক্ষণ কাৰ্যসূচীৰ সফল ৰূপায়ণ হৈছিল।
