প্ৰস্তাৱিত গহপুৰ আৰু নুমলীগড় সংযোগৰ বাবে ব্ৰহ্মপুত্ৰ নদীৰ ওপৰত সুৰংগ নিৰ্মাণৰ ক্ষেত্ৰত বন্যপ্ৰাণী ব’ৰ্ডে প্ৰকল্পটোৱে পৰিৱেশৰ ওপৰত বিশেষকৈ মাটিৰ স্থিৰতা, ভূগৰ্ভস্থ পানী, পলসৰ গতি আৰু ভূমিকম্পৰ আশংকাৰ ক্ষেত্ৰত প্ৰভাৱৰ বিষয়ে সম্যক অধ্যয়নৰ বাবে অনুৰোধ জনাইছে।
স্থানীয় বন্যপ্ৰাণীৰ যাতে কোনো ক্ষতি নহয় তাৰ বাবে সমিতিখনে প্ৰকল্পটোৰ সিতে জড়িত সংস্থা নেশ্যনেল হাইৱেজ এণ্ড ইনফ্ৰাষ্ট্ৰাকচাৰ ডেভেলপমেণ্ট কৰ্প’ৰেশ্যন লিমিটেডক (এনএইচআইডিচিএল) নিৰ্মাণ স্থানৰ ওচৰৰ জীৱ-জন্তু আৰু ইহঁতৰ বাসস্থান সুৰক্ষিত কৰাত সহায়ক হোৱাকৈ এটা পুঁজি গঠন কৰিবলৈ আহ্বান জনাইছে। তেওঁলোকে সুৰংগটোৰ বাবে মানৱ-জীৱ-জন্তুৰ সংঘাত প্ৰশমন আৰু বন্যপ্ৰাণী সংৰক্ষণ আৰু পৰিচালনাৰ এক বৈজ্ঞানসন্মত পৰিকল্পনা প্ৰস্তুত কৰিব লাগিব বুলিও মত প্ৰকাশ কৰিছে।
উল্লেখ্য যে গোলাঘাট জিলাৰ কাজিৰঙা বাঘ সংৰক্ষিত বনাঞ্চলৰ বাঘ কৰিডৰত প্ৰায় ১৩.৭৭ হেক্টৰ বনভূমি আৰু শোণিতপুৰ জিলাৰ কাজিৰঙা বাঘ সংৰক্ষিত বনাঞ্চলৰ ডিফল্ট ইক’-চেন্সিটিভ জ’নত ৬১.৫০২৮ হেক্টৰ ভূমিৰ প্ৰয়োজন হ’ব। ৰাষ্ট্ৰীয় বাঘ সংৰক্ষণ কৰ্তৃপক্ষই কিছুমান চৰ্ত সাপেক্ষে এই প্ৰকল্পত অনুমোদনৰ বাবে পৰামৰ্শ আগবঢ়াইছে।
এনবিডব্লিউএলে নিৰ্ধাৰণ কৰা চৰ্ত অনুসৰি ন্যূনতম বৃক্ষ কটা, সুৰংগ খননৰ ধ্বংসাৱশেষ আৰু পানীৰ কঠোৰ ব্যৱস্থাপনা নিশ্চিত কৰা, লগতে নদীলৈ বৈ যোৱাত বাধা প্ৰদানৰ ব্যৱস্থা কৰিব লাগিব। ইয়াৰ উপৰিও প্ৰকল্পস্থলীত শব্দ নিয়ন্ত্ৰণ ব্যৱস্থা যেনে বিস্ফোৰক আৰু যন্ত্ৰৰ ব্যৱহাৰৰ ক্ষেত্ৰত শব্দ আৰু কম্পন হ্ৰাস কৰিবলৈ সাৱধানতা অবলম্বন কৰাৰ লগতে ধূলি নিয়ন্ত্ৰণ ব্যৱস্থা স্থাপন কৰাৰ দিশতো ব’ৰ্ডে গুৰুত্ব আৰোপ কৰিছে।
পবিতৰা বন্যপ্ৰাণী অভয়াৰণ্যৰ সীমা সলনি কৰাৰ প্ৰস্তাৱৰ ওপৰতো সমিতিখনে আলোচনা কৰে। আলোচনাত উপনিত সিদ্ধান্ত অনুসৰি প্ৰায় ৪৭০ হেক্টৰ মাটি আঁতৰাই প্ৰায় ৫৬৫ হেক্টৰ মাটি যোগ কৰা হ’ব। কৃষি অঞ্চল আৰু ব্যক্তিগত ঘৰসমূহ অভয়াৰণ্যৰ পৰা বাদ দিয়াৰ লগতে ওচৰৰ কিছুমান জলাশয়কো অন্তৰ্ভুক্ত কৰাৰ লক্ষ্যৰে এই পৰিৱৰ্তন সাধন কৰা হৈছে ।
আলোচনাৰ অন্তত স্থায়ী সমিতিখনে সিদ্ধান্ত গ্ৰহণ কৰে যে, প্ৰস্তাৱটোৰ অনুমোদন দিয়াৰ পূৰ্বে এনবিডব্লিউএলৰ সদস্য ড° আৰ. সুকুমাৰ, মন্ত্ৰালয়ৰ এজন প্ৰতিনিধি আৰু ৰাজ্যৰ বন বিভাগৰ এজন প্ৰতিনিধিক লৈ এখন স্থান পৰিদৰ্শন সমিতি গঠন কৰা হ’ব। ইয়াৰ পিছত হে পৰৱৰ্তী কাৰ্যপন্থাৰ দিশে আগবাঢ়িব পৰা হ’ব বুলি মত প্ৰাকাশ কৰে।
