শেহতীয়আই দ্ৰুতগতিত বৃদ্ধি পাইছে সোণৰ মূল্য। ফলত বিনিয়োগকাৰীসকল লাভৱান হোৱাৰ বিপৰীতে মধ্যবিত্ত শ্ৰেণী ইয়াৰ বলি হ’বলগা হৈছে।
কিন্তু ইয়াৰ মাজতে আহিছে এটা ভাল খবৰ। কমিব পাৰে সোণৰ মূল্য। বিভিন্ন মাধ্যমত প্ৰকাশ পাইছে যে সোণৰ দাম ৩৮ শতাংশ পৰ্যন্ত হ্ৰাস পাব পাৰে।
যোৱা কেইমাহমানৰ ভাৰতৰ বজাৰত ক্ৰমাগতভাবে বৃদ্ধি পাইছে সোণৰ মূল্য। বিয়াৰ বতৰ চলি থকাৰ বাবেই সোণৰ দাম বৃদ্ধি পাইছে বুলি খবৰ প্ৰকাশ পাইছে।
কিন্তু এইবাৰ খবৰ আহিছে যে সোণৰ মূল্য বৃহৎ হাৰত হ্ৰাস পাব। একাধিক সূত্ৰই দাবী কৰিছে যে সোণৰ মূল্য ৩৮ শতাংশ পৰ্যন্ত হ্ৰাস পাব পাৰে।
উল্লেখ্য যে যোৱা ৩১ মাৰ্চ সোমবাৰে ১০ গ্ৰাম ২৪ কেৰেট সোণৰ মূল্য আছিল ৮৯,৫১০ টাকা। যদিহে ভবাৰ দৰে সোণৰ মূল্য হ্ৰাস হয় তেন্তে ১০ গ্ৰামৰ মূল্য ৫৫,৪৯৬ টকালৈ হ্ৰাস পাব পাৰে।
আমেৰিকাৰ বিত্তীয় সেৱা প্ৰতিষ্ঠান মৰ্নিংষ্টাৰৰ বিশ্লেষক জন মিলছৰ মতে, সোণৰ মূল্য প্ৰতি আউন্সত ১৮২০ ডলাৰলৈ হ্ৰাস পাব পাৰে। যিটো বৰ্তমানৰ মূল্যতকৈ প্ৰায় ৩৮ শতাংশ কম হ’ব।
বৰ্তমান প্ৰতি আউন্সত সোণৰ মূল্য ৩০৮০ ডলাৰ। ৰাজনৈতিক উত্তেজনা, আমেৰিকাৰ অৰ্থনীতিৰ অনিশ্চয়তা, মুদ্ৰাস্ফীতি বৃদ্ধিৰ আশংকাৰ বাবে বিগত সময়ছোৱাত সোণৰ মূল্য বৃদ্ধি পাইছে। তদুপৰি আমেৰিকাৰ ৰাষ্ট্ৰপতি ড’নাল্ড ট্ৰাম্পৰ বাণিজ্য যুদ্ধই সমগ্ৰ বিশ্বতে অস্থিৰতা বৃদ্ধি কৰিছে। সোণৰ মূল্য বৃদ্ধিৰ আনও আন এক কাৰণ।
জন মিলছৰ মতে সোণৰ মূল্য হ্ৰাসৰ সম্ভাৱনাৰ আঁৰৰ কাৰণ হ’ল সোণৰ যোগান দ্ৰুতগতিত বৃদ্ধি পাইছে। অষ্ট্ৰেলিয়াই সোণৰ উৎপাদন বৃদ্ধি কৰিবলৈ আৰম্ভ কৰিছে। পুৰণি সোণো বহু পৰিমাণে পুনঃব্যৱহাৰ কৰা হৈছে। ফলত বজাৰত সোণৰ পৰিমাণ বাঢ়িছে। সোণৰ যোগান বেছি হ’লে দাম কমি যাব। তদুপৰি সোণৰ মূল্য হ্ৰাসৰ আন এটা কাৰণ হ’ল চাহিদা হ্ৰাস পোৱাৰ লক্ষণ। কেইবাটাও পৰিসংখ্যা অনুসৰি কেন্দ্ৰীয় বেংকে সোণ ক্ৰয়ৰ হাৰ হয় হ্ৰাস কৰিব নহয় একেই ৰাখিব।
