Google Doodle Honours Bhupen Hazarika জন্মদিনত গুগলে সুঁৱৰিলে ডঃ ভূপেন হাজৰিকাক, ডুডলত জিলিকিল শিল্পী ৰুতুজা মালিয়ে অঁকা সুধাকণ্ঠৰ ছবি

আজি সুধাকণ্ঠ ডঃ ভূপেন হাজৰিকাৰ ৯৬ সংখ্যক জন্মদিন।সমগ্ৰ অসমবাসীয়ে আজি শ্ৰদ্ধাৰে সুঁৱৰিছে সুৰৰ যাদুকৰগৰাকীক। কেৱল অসমতে নহয়, বিশ্বৰ আন বহু ঠাইতো সুধাকণ্ঠৰ অনুৰাগী অসমীয়াই তেওঁকৰ জন্মদিন উপলক্ষ্যে বিভিন্ন অনুষ্ঠানৰ আয়োজন কৰিছে। গীতৰ মাজেৰে সমাজ পৰিৱৰ্তনৰ সপোন দেখা ভাৰতৰত্ন ডঃ ভূপেন হাজৰিকাক আজি সুঁৱৰিছে বিশ্বৰ বৃহত্তম চাৰ্ছ ইঞ্জিন গুগলেও।

আজি গুগলৰ ডুডলত সন্নিবিষ্ট কৰা হৈছে সুধাকণ্ঠৰ এখন ছবি।সুধাকণ্ঠৰ প্ৰতি গুগলে জনোৱা এই সন্মানক বহুতে প্ৰশংসা কৰা পৰিলক্ষিত হৈছে।আনহাতে আজি পুৱাৰে পৰা ছ’চিয়েল মিডিয়াতো নেটিজেনসকলে ডঃ ভূপেন হাজৰিকাৰ প্ৰতি শ্ৰদ্ধা জ্ঞাপন কৰা পৰিলক্ষিত হৈছে।

গুগল ডুডলত সন্নিবিষ্ট সুধাকণ্ঠৰ ছবিত সুধাকণ্ঠই চিৰপৰিচিত টুপী পৰিধান কৰি কান্ধত গামোচা লৈ হাৰমনিয়াম বজাই থকা দেখিবলৈ পোৱা গৈছে। মুম্বাইৰ শিল্পী ৰুতুজা মালিয়ে গুগলৰ বাবে এই ডুডলটো প্ৰস্তুত কৰিছে। গুগল ইণ্ডিয়াই অফিচিয়েল টুইটাৰ একাউন্টতো ডঃ ভূপেন হাজৰিকাৰ জন্মদিনত ডুডলৰ ছবি পোষ্ট কৰা দেখা গৈছে।