‘ হিমন্ত বিশ্ব শৰ্মাই নিৰ্বাচন নেখেলো বুলি কৈ নিজৰ গুৰুত্ব বঢ়াই পুনৰ নিৰ্বাচন খেলে’— এই মন্তব্য সাংসদ গৌৰৱ গগৈৰ।
কংগ্ৰেছৰ অসম বচাওঁ আহক কাৰ্য্যসূচীৰ অধীনত দেওবাৰে গোলাঘাটত অনুস্থিত হয় এক বৃহৎ জনসভা।
গোলাঘাট বিধানসভা সমষ্টিৰ ঊষা গৰঙা চাহ বাগিচা খেলপথাৰত অনুস্থিত জনসভাখনত প্ৰায় পাঁচ সহস্ৰাধিক লোকৰ সমাগম হয়।
অজন্তা নেওগৰ বিজেপি গমনৰ পাছত সমষ্টিটোত কংগ্ৰেছৰ হৃত গৌৰৱ উদ্ধাৰৰ ক্ষেত্ৰত এই জনসভাখনে বিশেষ তাৎপৰ্য বহন কৰিছে।
সভাত প্ৰদেশ কংগ্ৰেছৰ একাংশ ৰথী মহাৰথীৰ লগতে উপস্থিত থাকে প্ৰাক্তন কেন্দ্ৰীয় মন্ত্ৰী তথা AICC ৰ সম্পাদক মুকুল ৱাচনিক।
প্ৰদেশ কংগ্ৰেছৰ সভাপতি ৰিপুন বৰা, সাংসদ গৌৰৱ গগৈ, ৰ’জলীনা তিৰ্কী, মীৰা বৰঠাকুৰ, অজয় ফুকন আদি নেতাই নিজা ভাষণত প্ৰসংগত শাসনাধিষ্ঠিত বিজেপি চৰকাৰখনক ক্ষুৰধাৰ সমালোচনা কৰি আগন্তুক নিৰ্বাচনত কংগ্ৰেছ মিত্ৰজোঁটেই চৰকাৰ গঠন কৰিব বুলি দাবী কৰে।
কুইপৰ দুই বিষয়াক মুকলি কৰি অনাৰ স্বাৰ্থত গৃহমন্ত্ৰী অমিত শ্বাহলৈ পত্ৰ লিখিছে বুলি উক্ত সভাতে জানিবলৈ দিয়ে সাংসদ গৌৰৱ গগৈয়ে।
ভাষণ প্ৰসংগত তেওঁ ৰাজ্যৰ স্বাস্থ্য- শিক্ষা আদি দপ্তৰৰ মন্ত্ৰী হিমন্ত বিশ্ব শৰ্মাক কটাক্ষ কৰি কয় যে শৰ্মাই নিৰ্বাচন নেখেলো বুলি কৈ নিজৰ গুৰুত্ব বঢ়াই লয় আৰু পিছত পুনৰ নিৰ্বাচন খেলে।
