CAA বিৰোধী স্থিতি; চৰকাৰে নতুন দিল্লীৰ অসম ভৱনত প্ৰবেশ নিষিদ্ধ কৰিলে অসমীয়া সাংবাদিকৰ
ৰাজ্য জুৰি চলি থকা নাগৰিকত্ব (সংশোধন) আইন বিৰোধী আন্দোলনৰ আশংকাৰে নতুন দিল্লীস্থ অসম ভৱনত সাংবাদিকৰ প্ৰবেশ বন্ধ কৰিছে বিজেপি চৰকাৰে।
সোমবাৰে অসমৰ এটা সংবাদ গোষ্ঠীৰ সাংবাদিকে নতুন দিল্লীৰ অসম ভৱনত অনুষ্ঠিত হোৱা এখন সংবাদমেলত অংশগ্ৰহণ কৰিবলৈ যোৱাৰ সময়তে সুৰক্ষা কৰ্মীয়ে সাংবাদিকগৰাকীক অসম ভৱনত প্ৰবেশত বাধা দিয়ে।
উল্লেখযোগ্য যে, অসম চুক্তিৰ ছয় নং দফা কাৰ্য্যকৰী কৰাৰ বাবে গঠিত উচ্চস্তৰীয় সমিতিৰ সচিৱ অৱসৰপ্ৰাপ্ত ন্যায়াধীশ বিপ্লৱ শৰ্মাই সংবাদমেলখন অনুষ্ঠিত কৰিছিল।
পৰৱৰ্তী সময়ত শৰ্মাই অসম ভৱনৰ বাহিৰলৈ ওলাই আহি সংবাদ কৰ্মী সকলক সম্বোধন কৰিবলগীয়া হয়।
অসমত সংবাদ গোষ্ঠী সকলে CAA বিৰোধী স্থিতি গ্ৰহণ কৰা বাবে নতুন দিল্লীত থকা অসমৰ সংবাদ কৰ্মী সকল চৰকাৰৰ এনে ব্যৱহাৰৰ সন্মুখিন হৈছে বুলি ধাৰণা কৰা হৈছে।
অসম ভৱনৰ কৰ্মীসকলৰ সৈতে এই সম্পৰ্কত কথা পতাত তেওঁলোকে বিভাগীয় কৰ্তৃপক্ষৰ তৰফৰ পৰা অসম ভৱনত সংবাদ কৰ্মীৰ প্ৰৱেশ নিষিদ্ধ কৰা হৈছে বুলি প্ৰকাশ কৰে।
নৰ্থ-ইষ্ট মিডিয়া ফ’ৰামে সমগ্ৰ ঘটনাক গৰিহণা দি কেনেদৰে ৰাজহুৱা গেষ্ট হাউচত কোনো ব্যক্তিৰ প্ৰৱেশ নিষিদ্ধ কৰিব পাৰে বুলি প্ৰশ্ন তোলে।