গুৱাহাটীত চলি থকা তৃতীয় খেলো ইণ্ডিয়া য়ুথ গেইমছত এতিয়াও পদকৰ তালিকাত খাটা খুলিব পৰা নাই উত্তৰ-পূবৰ তিনিখন ৰাজ্য ক্ৰমে মেঘালয়, নাগালেণ্ড আৰু ছিকিমে।
প্ৰতিযোগিতাখনত মেঘালয়ে পাঁচটা ইভেণ্টত অংশ লৈছে। ইভেণ্ট কেইটা হ’ল- ফুটবল, এথলেটিকছ, বক্সিং, জুডো আৰু শ্বুটিং।
আনহাতে মাত্ৰ ১০জন খেলুৱৈৰে গঠিত নাগালেণ্ডে তিনিটা ইভেণ্ট ক্ৰমে আৰ্চাৰী, এথলেটিকছ আৰু মল্লযুঁজত অংশ লৈছে। আৰ্চাৰী আৰু এথলেটিকছত দুজন দুজন আৰু মল্লযুঁজত ৬জন খেলুৱৈয়ে অংশ লৈছে।
প্ৰতিযোগিতাখনৰ আয়োজক ৰাজ্য অসমৰ প্ৰদৰ্শনো খুব এটা সন্তোষজনক নহয়। অসমে এই পৰ্যন্ত তিনিটা সোণ, চাৰিটা ৰূপ আৰু পাঁচটা ব্ৰঞ্জৰ পদকেৰে তালিকাৰ ১৩ নম্বৰ স্থানত আছে।
১৭ টা স্বৰ্ণ, ২২ টা ৰূপ আৰু ৩৭ টা ব্ৰঞ্জৰ পদকেৰে তালিকাৰ শীৰ্ষত আছে মহাৰাষ্ট্ৰ। দ্বিতীয় স্থানত আছে হাৰিয়ানা। হাৰিয়ানাই এই পৰ্যন্ত ১৭ টা স্বৰ্ণ, ১৬ টা ৰূপ আৰু ১৫ টা ব্ৰঞ্জৰ পদক অৰ্জন কৰিছে।
আনহাতে ১২ টা স্বৰ্ণ পদকেৰে তালিকাৰ তৃতীয় স্থানত আছে দিল্লী।
ইফালে উত্তৰ-পূবৰ ৰাজ্য কেইখনৰ ভিতৰত পদক অৰ্জনৰ শীৰ্ষত আছে মণিপুৰ। মণিপুৰে ৪ টা স্বৰ্ণ, ৩ টা ৰূপ আৰু ৭ টা ব্ৰঞ্জৰ পদকেৰে তালিকাৰ নৱম স্থানত আছে মণিপুৰ।
৪ টা স্বৰ্ণ আৰু ১ টা ৰূপৰ পদকেৰে ত্ৰিপুৰা আছে তালিকাৰ দশম স্থানত।
উল্লেখ্য যে গুৱাহাটীত যোৱা ১০ জানুৱাৰিৰ পৰা আৰম্ভ হোৱা তৃতীয় খেলো ইণ্ডিয়া য়ুথ গেইমছ ২২ জানুৱাৰিলৈকে চলিব।
