বিজেপিৰ দিচপুৰ সমষ্টিৰ বিধায়ক অতুল বৰাই পুনৰ নিজৰ চৰকাৰখনৰ বিৰুদ্ধে বিস্ফোৰক মন্তব্য দাঙি ধৰিছে। বৃহস্পতিবাৰে বৰাই কয় যে নমামি ব্ৰহ্মপুত্ৰ উৎসৱ পাতি যি ধন খৰচ কৰা হ’ল সেই ধনেৰে যদি কেইখনমান ভাল ফেৰী কিনিলেহেঁতেন তেন্তে অংকিতা বৰাৰ দৰে ছাত্ৰীৰ মৃত্যু নহ’লহেঁতেন।
তেওঁ লগতে কয় যে উত্তৰ গুৱাহাটীৰ ভুটভুটী নাও দুৰ্ঘটনাৰ পাছত চৰকাৰে ফেৰী কিনিছে। নমামি ব্ৰহ্মপুত্ৰ উৎসৱ নাপাতি ফেৰী আগতে কিনিব পাৰিলেহেঁতেন।
আনহাতে, দল আৰু চৰকাৰৰ নীতিত অসন্তুষ্ট হৈ পৰা বিধায়কজনে তেওঁ কৰি অহা এনে ধৰণৰ মন্তৱ্যৰ বাবে দলৰ পৰা নিলম্বন বা বহিষ্কাৰ হ’বলগীয়া হ’লেও ভয় নকৰে বুলি মন্তব্য কৰিছে।
সংবাদ মাধ্যমৰ আগত বৃহস্পতিবাৰে বিধায়ক অতুল বৰাই কয় যে তেওঁ যিবোৰ কথা ক’ব লাগে বুলি ভাৱে সেই কথাবোৰ কৈ যাব। তাৰ বাবে যদি দলৰ পৰা নিলম্বন বা বহিষ্কাৰো হ’ব লাগে সেয়া কথা নাই, তথাপি ভয় ভিত্তিৰ দ্বাৰা তেওঁ পৰিচালিত নহয়।
উল্লেখযোগ্য যে হিন্দু বাংলাদেশীক নাগৰিকত্ব সংশোধনী বিধেয়কৰ দ্বাৰা নাগৰিকত্ব প্ৰদানৰ বাবে ৰাজ্য আৰু কেন্দ্ৰীয় চৰকাৰে চলোৱা প্ৰচেষ্টাৰ বিৰোধিতা কৰি তেওঁ এই বিধেয়কৰ বিৰুদ্ধে অকলে হ’লেও মাত মাতি যাব বুলিও মন্তব্য কৰি আহিছে বিধায়ক বৰাই।
তদুপৰি, যোৱা ৩০ অক্টোবৰত গণেশগুৰিত ধাৰাবাহিক বিস্ফোৰণত নিহতসকলৰ শ্ৰদ্ধাঞ্জলি অনুষ্ঠানত মুখ্যমন্ত্ৰী উপস্থিত নাথাকি কাজিৰঙাৰ আন এখন সভাত অংশগ্ৰহণ কৰাৰ বাবে মুখ্যমন্ত্ৰীকো সমালোচনা কৰিছিল দিচপুৰৰ বিধায়ক গৰাকীয়ে।
