৩১ জানুৱাৰীত ভাস্কৰ জ্যোতি মহন্তৰ অৱসৰ; পৰৱৰ্তী আৰক্ষী সঞ্চালক প্ৰধান জি পি সিং!
অহা ৩১ জানুৱাৰীত অসম আৰক্ষী বৰ্তমানৰ সঞ্চালক প্ৰধান ভাস্কৰজ্যোতি মহন্তৰ কাৰ্যকাল সমাপ্ত হ’ব। মহন্তৰ অৱসৰৰ পিছত পৰৱৰ্তী আৰক্ষী সঞ্চালক প্ৰধান নিযুক্তি প্ৰক্ৰিয়া সম্পূৰ্ণ নোহোৱালৈকে ৰাজ্যৰ আৰক্ষী সঞ্চালক প্ৰধান হিচাপে দায়িত্ব পালন কৰিব জি পি সিঙে ।
কলাক্ষেত্ৰত আয়োজিত এক অনুষ্ঠানত মুখ্যমন্ত্ৰী হিমন্ত বিশ্ব শৰ্মাই এই কথা সদৰী কৰিছে। ইপিনে, অসম আৰক্ষীৰ বিশেষ সঞ্চালক প্ৰধান হিচাপে কাৰ্যনিৰ্বাহ কৰি থকা জি পি সিঙে মুখ্যমন্ত্ৰীলৈ ধন্যবাদ জ্ঞাপন কৰি এক টুইট কৰিছে।
বৰ্তমান ৰাজ্যখনৰ স্থায়ী পৰৱৰ্তী আৰক্ষী সঞ্চালক প্ৰধান নিযুক্তি প্ৰক্ৰিয়া চলি আছে। এই সন্দৰ্ভত গৃহ বিভাগলৈ আৰক্ষী বিভাগৰ পৰা কেইবাটাও নাম প্ৰস্তাৱ কৰা হৈছে।
মা কামাখ্যাৰ আশীৰ্বাদেৰে অসমবাসীৰ সেৱা কৰাৰ সুযোগ পাই মই ধন্য। গৌৰৱময় অসম আৰক্ষীক নেতৃত্ব দিবলৈ মোৰ ওপৰত আস্থা ৰখাৰ বাবে মাননীয় মুখ্যমন্ত্ৰী অসম মহোদয়লৈ কৃতজ্ঞতা। @assampolice @CMOfficeAssam
— GP Singh (@gpsinghips) January 28, 2023
এই সম্পূৰ্ণ প্ৰক্ৰিয়া চোৱা চিতা কৰিছে গৃহ বিভাগৰ প্ৰধান সচিব নীৰজ বাৰ্মাই। মুখ্যমন্ত্ৰীৰ ইংগিত অনুসৰি জি পি সিঙেই ৰাজ্যখনৰ পৰৱৰ্তী আৰক্ষী সঞ্চালক প্ৰধান হোৱাটো প্ৰায় নিশ্চিত!
জি পি সিং ১৯৯১ বৰ্ষৰ অসম-মেঘালয় কেডাৰৰ এগৰাকী ভাৰতীয় আৰক্ষী সেৱাৰ (আই পি এছ) বিষয়া।