জি এছ টিয়ে বহু প্ৰত্যাশিত জীৱন বীমা আৰু স্বাস্থ্য বীমাৰ প্ৰিমিয়াম হ্ৰাস কৰিব বুলি আশা কৰা হৈছিল। কিন্তু ৰাজস্থানৰ জয়ছালমেৰত অনুষ্ঠিত জি এছ টি কাউন্সিলৰ ৫৫ সংখ্যক বৈঠকত তেনে কোনো সিদ্ধান্ত লোৱা নহ’ল।
বিত্তমন্ত্ৰী নিৰ্মলা সীতাৰমনৰ উপস্থিতিত বৈঠকৰ অন্তত সংবাদ মাধ্যমৰ আগত বিহাৰৰ উপ-মুখ্যমন্ত্ৰী সম্ৰাট চৌধুৰীয়ে সেইকথা জনায়। ইপিনে বহু সামগ্ৰীৰ ওপৰত জি এছ টিৰ হাৰ সলনি কৰা হৈছে।
বৈঠকৰ অন্তত গম পোৱা গৈছে যে নিমখ আৰু মছলাযুক্ত নোহোৱা পপকৰ্ণ বা কৰ্ণ ফ্ৰিটাৰৰ ওপৰত ৫ শতাংশ জি এছ টি আৰোপ কৰা হৈছে। প্ৰি-পেকেজড মাকৈদানাৰ ওপৰত ১২ শতাংশ জি এছ টি আৰু কেৰামেল আৱৰণযুক্ত পপকৰ্ণত ১৮ শতাংশ জি এছ টি আৰোপ থাকিব।
পুৰণি বৈদ্যুতিক বাহন আৰু ব্যৱহৃত পেট্ৰ’ল বাহন বিক্ৰীৰ ক্ষেত্ৰত জি এছ টি বৃদ্ধি কৰা হৈছে। এই ক্ষেত্ৰত ১২ শতাংশৰ পৰা ১৮ শতাংশ কৰ আদায় কৰা হ’ব। বটলত ভৰোৱা পানী আৰু ১০ হাজাৰ টকাৰ তলৰ মূল্যৰ চাইকেলৰ জি এছ টি ৫%লৈ হ্ৰাস কৰাৰ প্ৰস্তাৱ দিয়া হৈছে।
অৱশ্যে জীৱন বীমা আৰু স্বাস্থ্য বীমাৰ প্ৰিমিয়ামৰ কৰ হ্ৰাস কৰাৰ সিদ্ধান্ত পিছুৱাই দিয়াৰ কথা স্পষ্ট কৰি দিয়ে সম্ৰাট চৌধুৰীয়ে।
পোছাকৰ ওপৰত জি এছ টি বৃদ্ধিৰ প্ৰস্তাৱ দিয়া হৈছে। ১৫ হাজাৰ টকাৰ ভিতৰত মূল্যৰ কাপোৰৰ ওপৰত ৫ শতাংশ, ১০ হাজাৰ টকাৰ ওপৰৰ কাপোৰৰ ওপৰত ২৮ শতাংশ জি এছ টিৰ প্ৰস্তাৱ দিয়া হৈছে। এই ঘটনাক লৈ ক্ষুব্ধ হৈ পৰিছে বস্ত্ৰ উদ্যোগৰ সৈতে জড়িত ব্যৱসায়ীসকল।
জম্মু-কাশ্মীৰৰ প্ৰাক্তন মুখ্যমন্ত্ৰী মেহবুবা মুফতিয়ে এনে প্ৰস্তাৱৰ বিৰুদ্ধে সৰৱ হৈছে। তেওঁ কয় যে কাশ্মীৰৰ বিখ্যাত শ্বলত যদি ২৮ শতাংশ জি এছ টি দিব লাগে তেন্তে এই উদ্যোগ ক্ষতিগ্ৰস্ত হ’ব। ই কেৱল কাশ্মীৰীসকলৰ জীৱিকাই নহয়, কাশ্মীৰৰ এক আন্তৰ্জাতিক পৰিচয়ো।
