আমেৰিকাৰ চোৰাংচোৱা সংস্থা এফ বি আইৰ দহজন মষ্ট ৱাণ্টেড অপৰাধীৰ তালিকাত আছে গুজৰাটৰ ৩৪ বছৰীয়া ভদ্ৰেশকুমাৰ চেতনভাই পেটেল। ২০১৫ চনৰ এপ্ৰিল মাহত মেৰিলেণ্ডত ভদ্ৰেশে পত্নীক হত্যা কৰাৰ অভিযোগ আছে। এফ বি আইয়ে পেটেলক গ্ৰেপ্তাৰ কৰিব পৰা তথ্যৰ বাবে ২ লাখ ৫০ হাজাৰ ডলাৰ (প্ৰায় ২.১৬ কোটি টকা) পুৰস্কাৰ দিয়াৰ কথা ঘোষণা কৰিছে।
গুজৰাটত জন্মগ্ৰহণ কৰা পেটেলে মেৰিলেণ্ডৰ এখন ডোনাটৰ দোকানত কাম কৰিছিল। পত্নী পলকেও তাত কাম কৰিছিল। তদন্তত প্ৰকাশ পাইছে যে ২০১৫ চনৰ এপ্ৰিল মাহত কৰ্মস্থলীত থকা অৱস্থাত পেটেলে গধুৰ বস্তুৰে পত্নীৰ মূৰত উপৰ্যুপৰি আঘাত কৰিছিল। ঘটনাস্থলীতে পলকৰ মৃত্যু হয়।
হত্যাকাণ্ডৰ লগে লগে পেটেলৰ বিৰুদ্ধে গ্ৰেপ্তাৰী পৰোৱানা জাৰি কৰা হয়। তেওঁৰ বিৰুদ্ধে ফাৰ্ষ্ট ডিগ্ৰী আৰু ছেকেণ্ড ডিগ্ৰী হত্যা, ফাৰ্ষ্ট ডিগ্ৰী আৰু ছেকেণ্ড ডিগ্ৰী আক্ৰমণ আৰু বিপজ্জনক অস্ত্ৰৰে আক্ৰমণৰ অভিযোগ উত্থাপন হৈছে।
তদন্তকাৰীয়ে জনোৱা মতে, ২১ বছৰীয়া পলকে সেই সময়ত ভাৰতলৈ উভতি আহিব বিচাৰিছিল। কিন্তু স্বামীয়ে এই কথাত আপত্তি কৰিছিল। হত্যাকাণ্ডৰ এমাহ পূৰ্বে পেটেলৰ ৱৰ্ক ভিছাৰ ম্যাদ উকলি গৈছিল।
এফ বি আইৰ বাল্টিমোৰ ডিভিজনৰ দায়িত্বত থকা বিশেষ এজেণ্ট জনাথন শ্বেফাৰে কয় যে সম্ভৱতঃ পলকে ভাৰতলৈ ঘূৰি অহাৰ সিদ্ধান্তত তেওঁৰ সুনাম কলংকিত হোৱাৰ আশংকা কৰি পেটেল ক্ষুব্ধ হৈ পৰিছিল।
হত্যাকাণ্ডৰ পিছত পলায়ন কৰে ভদ্ৰেশ। তদন্তকাৰীৰ মতে, পেটেলে হয়তো আমেৰিকাত আত্মীয়ৰ সৈতে আত্মগোপন কৰি আছে, বা কানাডা নাইবা ভাৰতলৈ পলায়ন কৰিছে।
এফ বি আইয়ে বৃহস্পতিবাৰে পেটেলক “সশস্ত্ৰ আৰু অত্যন্ত বিপজ্জনক” বুলি ঘোষণা কৰিছে। পেটেলৰ বিষয়ে কোনো লোকৰ হাতত তথ্য থাকিলে এফ বি আইৰ সৈতে যোগাযোগ কৰিবলৈ কোৱা হৈছে।
