বৈধ বিবাহৰ প্ৰমাণ পত্ৰ থকাৰ পিছতো অসবৰ্ণ বিবাহৰ বাবে গুৱাহাটীৰ তিনিটা মন্দিৰত বিবাহ অনুষ্ঠানৰ পৰা বঞ্চিত হ’ল এহাল দম্পতী।
আইনী বিবাহৰ প্ৰমাণ পত্ৰ থকাৰ পিছতো মহানগৰীৰ লালগনেশ অঞ্চলৰ বাসিন্দা ৰাজ আচাৰ্যীয়ে বশিষ্ঠ মন্দিৰ আৰু চহৰখনৰ আন দুটা মন্দিৰত বিবাহ অনুষ্ঠিত কৰাৰ পৰা বঞ্চিত হয় কিয়নো তেওঁ এগৰাকী “নিম্ন বৰ্ণৰ” মহিলাক বিয়া কৰাইছিল।
বাতৰি অনুসৰি, ২০২৫ চনৰ ৩ মাৰ্চত তেওঁৰ বিবাহ অনুষ্ঠিত কৰিবলৈ ২০২৪ ৰ ডিচেম্বৰ মাহতে বশিষ্ঠ মন্দিৰ বুকিং কৰিছিল। প্ৰথমে তেওঁক কোৱা হৈছিল যে আদালতৰ বিবাহৰ প্ৰমাণ পত্ৰৰ প্ৰয়োজন, যিটো তেওঁ ২০২৫ চনৰ ২০ জানুৱাৰীত দুয়োটা পৰিয়ালৰ অনুমোদন সাপেক্ষে লাভ কৰিছিল।
কিন্তু ১৩ ফেব্ৰুৱাৰীত যেতিয়া তেওঁ প্ৰমাণ পত্ৰ জমা দিবলৈ মন্দিৰলৈ আহিছিল, তেতিয়া এজন বেলেগ পুৰোহিতে বৰ্ণৰ পাৰ্থক্যৰ কথা উল্লেখ কৰি অনুষ্ঠানটো কৰিবলৈ অস্বীকাৰ কৰিছিল।
আচাৰ্যীয়ে কয়, ‘’যেতিয়া মই প্ৰশ্ন কৰিছিলো যে তেওঁলোকে মোক আগতে কিয় জনোৱা নাছিল, মোৰ যোগাযোগৰ তথ্য থকাৰ পিছতো তেওঁলোকে দাবী কৰিছিল যে মোৰ বুকিং লোৱা ব্যক্তিজন নতুন আৰু এই ‘জাতিগত নিয়ম’ৰ বিষয়ে অজ্ঞাত।‘’
বৰ্ণভিত্তিক অস্বীকাৰ নিশ্চিত কৰি লিখিত বিবৃতিৰ বাবে তেওঁৰ অনুৰোধ নাকচ কৰে পুৰোহিতসকলে, তাৰ পৰিৱৰ্তে তেওঁক আন এটা মন্দিৰ বিচাৰিবলৈ পৰামৰ্শ দিয়ে।
কামাখ্যা আৰু শুক্ৰেশ্বৰকে ধৰি গুৱাহাটীৰ অন্যান্য বিশিষ্ট মন্দিৰত একেধৰণৰ প্ৰত্যাখ্যানৰ সন্মুখীন হোৱা বুলি আচাৰ্জীয়ে কয়।
তেওঁ কয়, “এই অভিজ্ঞতাই গভীৰভাৱে হতাশাজনক আৰু মনোকষ্টদায়ক হৈ পৰিছে। পিতৃ-মাতৃৰ অনুমোদন আৰু আইনী বিবাহৰ প্ৰমাণ পত্ৰ লৈ যদি দুজন সন্মতিশীল হিন্দু প্ৰাপ্তবয়স্কই কোনো মন্দিৰত তেওঁলোকৰ বিয়াৰ অনুষ্ঠান সম্পন্ন কৰিব নোৱাৰে, তেন্তে বিশ্বাসৰ প্ৰতিষ্ঠানটো ক’ত থিয় হৈ আছে?”
পৰম্পৰাৰ উদ্ধৃতি দি মন্দিৰ কৰ্তৃপক্ষই অসবৰ্ণ বিবাহক অস্বীকাৰ কৰাত ক্ষোভৰ সৃষ্টি হৈছে।
“এয়া অতি নিন্দনীয়। দম্পতীহালৰ অধিকাৰ খৰ্ব কৰাৰ বাবে কৰ্তৃপক্ষই তৎক্ষণাত ক্ষমা খুজিব লাগে। তেওঁলোকে কি বাৰ্তা প্ৰেৰণ কৰিছে?” এই মন্তব্য গুৱাহাটীৰ এগৰাকী বাসিন্দাৰ।
আন এগৰাকী বাসিন্দাই লগতে কয়, “বিভাজন আৰু বৈষম্যৰ সৃষ্টি কৰা পৰম্পৰাসমূহ বিলুপ্ত কৰা উচিত। দুৰ্ভাগ্যজনকভাৱে মন্দিৰ কৰ্তৃপক্ষই এনে এক পৰম্পৰাক প্ৰচাৰ কৰিছে।”
