Ambubachi Mela ২২ জুনৰ পৰা ২৬ জুনলৈ নীলাচল পাহাৰৰ মা কামাখ্যা ধামত অম্বুবাচী মেলা আৰম্ভ হ’ব। এইবাৰ অম্বুবাচীৰ প্ৰবৃত্তি হ’ব ২২জনুৰ নিশা ৮বাজি ১৮ মিনিটত। প্ৰবৃত্তিৰ লগে লগে মন্দিৰৰ দুৱাৰ দৰ্শনাৰ্থীৰ বাবে বন্ধ হৈ পৰিব। সেইদৰে অম্বুবাচীৰ নিবৃত্তি হ’ব ২৬ জুনৰ পুৱা ৮বাজি ৪৫ মিনিটত। ইয়াৰ লগে লগে মন্দিৰৰ দুৱাৰো দৰ্শনাৰ্থীৰ বাবে মুকলি হ’ব।
অম্বুবাচী মেলা উপলক্ষে যান-বাহন চলাচলৰ নতুন পথ নিৰ্দেশনা দাঙি ধৰা হৈছে। গুৱাহাটী ট্ৰেফিক আৰক্ষীয়ে যান-বাহনৰ চলাচল সুচাৰুৰূপে নিশ্চিত কৰাৰ বাবে যান-বাহনৰ চলাচলৰ ক্ষেত্ৰত কিছু সাল-সলনি আৰু নিষেধাজ্ঞা আৰোপ কৰিছে৷
যান-বাহনৰ আৰক্ষী উপায়ুক্তৰ কাৰ্যালয়ে জাৰি কৰা নিৰ্দেশ অনুসৰি এই নতুন নিয়ম ২২ জুনৰ পৰা ২৬ জুনলৈ বাহাল থাকিব৷
নিয়মসমূহ ক্ৰমে:-
১)ফেৰী গাড়ী, অত্যাৱশ্যকীয় সেৱাৰ সৈতে সম্পৰ্কিত বাহন, আৰু কামাখ্যা মন্দিৰৰ কেইখনমান বাহন আৰু জিলা প্ৰশাসনৰ দ্বাৰা কৰ্তৃত্বপ্ৰাপ্ত আৱাসীসকলৰ বাহিৰে, ২২ জুনৰ পৰা ২৬ জুনলৈ কামাখ্যা মন্দিৰৰ ফালে আৰু কামাখ্যা মন্দিৰ অভিমুখে কোনো বাহন প্ৰৱেশ কৰিবলৈ অনুমতি দিয়া নহ’ব৷
২) আন্তঃজিলা আৰু দীঘলীয়া দূৰত্বৰ বাছৰ অনুমতি নাই৷
৩)সামগ্ৰী পৰিবহন কৰা গধুৰ, মজলীয়া আৰু সৰু বাণিজ্যিক বাহনবোৰ ডিজি ৰোড বা এমজি ৰোডত চলাবলৈ অনুমতি দিয়া নহ’ব৷
৪)ভৰলুমুখৰ ফালৰ পৰা কামাখ্যা গেট অভিমুখে অহা বাহনসমূহে ভক্তসকলক কামাখ্যা গেটৰ ওচৰত নমাই থৈ জালুকবাৰী অভিমুখে আগবাঢ়িব আৰু বৰিপাৰা ফিল্ডত পাৰ্ক কৰিব পাৰিব৷
৫)মালিগাঁওৰ ফালৰ পৰা কামাখ্যা গেট অভিমুখে অহা বাহনসমূহে ভক্তসকলক কামাখ্যা গেটৰ ওচৰত নমাই দিব আৰু ভৰালুমুখ অভিমুখে যাব লাগিব৷
৬)পাণ্ডু মন্দিৰ ঘাটৰ পৰা নতুনকৈ নিৰ্মাণ কৰা পথটো ব্যৱহাৰ কৰিবলৈ বাহনসমূহক অনুমতি দিয়া নহয়৷
আগন্তুক অম্বুবাচী মহোৎসৱৰ সময়ত লব লগা ব্যৱস্থাবলী সমূহ হৈছে:-
ক) এইবেলি নীলাচল পাহাৰৰ আশে-পাশে তীর্থযাত্ৰীৰ থকা-খোৱাৰ ব্যৱস্থা নাথাকিব।
খ) কামাখ্যাৰ নামনিৰ পৰা অহা পদ-পথ সমূহৰ লগতে মটৰ পথছোৱাত মাজে মাজে খোৱাপানী, জিৰণিচ’ৰা, জোতা-চেণ্ডেল ৰখাৰ ব্যৱস্থা থাকিব।
গ) এইবেলি অম্বুবাচীৰ সময়ত যাত্ৰী সকলে মন্দিৰ পৰিক্ৰমাৰ পাছত পশ্চিম দুৱাৰ হৈ গমন কৰাৰ ব্যৱস্থা থাকিব।
ঘ) আইন শৃঙ্খলা ও তীর্থ যাত্ৰীৰ সুৰক্ষাৰ ব্যৱস্থাৰ বাবে দেৱালয়ৰ নিজা ১২০ জন স্থায়ী সুৰক্ষা কৰ্ম্মী, ৪০০ জন স্কাউট-গাইড, ৪০০ জন স্বেচ্ছাসেৱক, ১০০ জন অস্থায়ী সুৰক্ষা কৰ্ম্মী নিয়োগ কৰা হ’ব। ইয়াৰ উপৰিও দেৱালয়ৰ চৌপাশে ৩০০ চি.চি.টি.ভি. কেমেৰা স্থাপন কৰা হ’ব।
লগতে ভক্তসকলৰ বাবে পুৰণি জে’লৰ অস্থায়ী আৱাসত টিকটৰ ব্যৱস্থা কৰা হৈছে৷ ভক্তসকলৰ আধাৰ আৰু ভোটাৰ কাৰ্ড পৰীক্ষা কৰা হৈছে৷
