যোৱা দেওবাৰে সন্ধিয়া মাফিয়াৰ এটা দলে গুৱাহাটীৰ আজাৰাস্থিত এখন বিশ্ববিদ্যালয়ৰ মাটি দখল কৰিবলৈ চেষ্টা চলোৱাৰ এক চাঞ্চল্যকৰ অভিযোগ উত্থাপন হৈছে।
গিৰিজানন্দ চৌধুৰী বিশ্ববিদ্যালয়ৰ মাটিখিনি দখলৰ চেষ্টা কৰা এদল ভূ-মাফিয়াই চিচিটিভি কেমেৰাত শিলগুটি নিক্ষেপ কৰাৰ লগতে বিশ্ববিদ্যালয়খনৰ বিভিন্ন সা-সম্পত্তি ধ্বংস কৰাৰ ফুটেজ আৱদ্ধ হৈছে।
জি-২০ প্ৰতিনিধিয়ে গুৱাহাটীত থকাৰ সময়তে আজাৰা আৰক্ষীৰ নাকৰ তলত এই ঘটনা সংঘটিত হোৱা কথাটোৱে ৰাজ্যৰ আইন শৃংখলাৰ অৱণতিকে সূচাইছে বুলিব পাৰি।
বিশ্ববিদ্যালয়খনৰ এগৰাকী বিষয়াই কয়, “গুৱাহাটীত জি-২০ৰ প্ৰতিনিধি উপস্থিত থকাৰ সময়ত এখন বিশ্ববিদ্যালয়ৰ এদল ভূমি মাফিয়াই মাটি দখল কৰাৰ চেষ্টা কৰাতো সঁচাই গুৱাহাটীৰ লগতে ৰাজ্যখনৰ বাবে এক লজ্জাজনক কথা।”
উল্লেখ্য, ২৫০ জন প্ৰতিনিধিয়ে গুৱাহাটীৰ এখন হোটেলত বাহৰ পাতি থকাৰ লগতে আই আই টি গুৱাহাটীত চলি আছে তিনিদিনীয়া Y20 Inception সভাও অনুষ্ঠিত হৈ আছিল।
ইফালে ঘটনা সন্দৰ্ভত গিৰিজানন্দ চৌধুৰী বিশ্ববিদ্যালয়ৰ পঞ্জীয়কে আজাৰা আৰক্ষী থানাত এখন এজাহাৰ দাখিল কৰিছে যদিও অদ্যপি ভূমি দখলৰ চেষ্টাত জড়িত দুষ্কৃতিকাৰীৰ বিৰুদ্ধে কোনো ব্যৱস্থা গ্ৰহণ কৰা হোৱা নাই।
“ডাগ নং: ৪৭, পট্টা নং: ৫৪১, গাঁও- আজাৰা, মৌজা- ৰামছাৰাণী, জিলা কামৰূপৰ অধীনত আমাৰ বিশ্ববিদ্যালয়ৰ মাটি দখল কৰাৰ উদ্দেশ্যেৰে ০৬-০২-২০২৩ তাৰিখে সন্ধিয়া প্ৰায় ৫.৩০ বজাত প্ৰায় ৪০ৰ পৰা ৫০জন দুষ্কৃতিকাৰীয়ে আমাৰ চিচিটিভি কেমেৰাত শিলগুটি নিক্ষেপ কৰা, বিশ্ববিদ্যালয়ৰ সা-সম্পত্তি ভাঙি ধ্বংস কৰাৰ দৰে অবৈধ আৰু অসামাজিক কাম কৰা দেখা গৈছিল।,” এফআইআৰখনত এইদৰে কোৱা হৈছে।
“এফআইআৰত আমি আৰক্ষীক অনুৰোধ কৰিছিলো যে মাফিয়াৰ বিৰুদ্ধে তৎকালীন ব্যৱস্থা ল’ব লাগে। কিন্তু, এই ঘটনা সন্দৰ্ভত এতিয়ালৈকে কোনো লোকক আৰক্ষীয়ে গ্ৰেপ্তাৰ কৰা নাই।”- জিচিইউৰ পঞ্জীয়কগৰাকীয়ে এইদৰে কয়।
তেওঁ অভিযোগ কৰে যে আজাৰা আৰক্ষীৰ এটা দলে এই কাণ্ডৰ পাঁচজন অভিযুক্তক আটক কৰিছিল যদিও আচৰিত কথাটো হ’ল পিছত আৰক্ষীয়ে তেওঁলোকক মুকলি কৰি দিয়ে।
আজাৰা থানাৰ ভাৰপ্ৰাপ্ত বিষয়া তপন কলিতাৰ সৈতে যোগাযোগ কৰাত তেওঁ কয়, “আমি ঘটনাৰ সৈতে জড়িতসকলৰ বিৰুদ্ধে গোচৰ ৰুজু কৰি তদন্ত আৰম্ভ কৰিছো। এতিয়ালৈকে কোনো লোকক গ্ৰেপ্তাৰ কৰা হোৱা নাই।”
