সাক্ষাৎ কৰিবলৈ অহা মুখ্যমন্ত্ৰীক অসমীয়া ভাষা ৰক্ষাৰ আহ্বান জ্ঞানপীঠ বঁটা বিজয়ী নীলমনি ফুকনৰ

অসমীয়া ভাষাটো মুখ্যমন্ত্ৰীক যিকোনো প্ৰকাৰে ৰক্ষা কৰাৰ আহ্বান জনালে জ্ঞানপীঠ বঁটা বিজয়ী কাব্যঋষি নীলমনি ফুকনে। বৃহস্পতিবাৰে মুখ্যমন্ত্ৰী হিমন্ত বিশ্ব শৰ্মাই কবি গৰাকীৰ গুৱাহাটীস্থ বাসভৱনত উপস্থিত হোৱাৰ সময়ত তেওঁ এনেদৰে মুখ্যমন্ত্ৰীগৰাকীক আহ্বান জনায়।

তেওঁ মুখ্যমন্ত্ৰীগৰাকীক সৰ্বোচ্চ ত্যাগ কৰি অসমীয়া ভাষাটো জীয়াই ৰাখিব লাগিব বুলি আহ্বান জনাই কয়,’ভাষাটো নাথাকিলে মানুহ নাথাকে, মানুহ নাথাকিলে মাটি নাথাকিব আৰু মাটি নাথাকিলে স্বকীয়তাও নাথাকে।‘’

বৃহস্পতিবাৰে মুখ্যমন্ত্ৰী হিমন্ত বিশ্ব শৰ্মাই জ্ঞানপীঠ বঁটা বিজয়ী কাব্যঋষি নীলমনি ফুকনৰ মালিগাঁওস্থিত বাসভৱনত উপস্থিত হৈ কবিগৰাকীৰ স্বাস্থ্যৰ বুজ লোৱাৰ লগতে জ্ঞানপীঠ বঁটাৰ বাবে অভিনন্দন জ্ঞাপন কৰে।

মুখ্যমন্ত্ৰীগৰাকীয়ে টুইটযোগে তেওঁৰ সাক্ষাতৰ কথা ব্যক্ত কৰি কয়,’’ শ্ৰদ্ধেয় ফুকন ছাৰৰ পৰ্বতসম অৱদানে অসমীয়া ভাষা আৰু সাহিত্যৰ জগতখনক সদা গৌৰৱান্বিত কৰিব। তেখেতৰ সুস্বাস্থ্য আৰু দীৰ্ঘায়ু কামনাৰে ভগৱানৰ ওচৰত প্ৰাৰ্থনা জনালোঁ৷’’