ককৰোচ জনতা পাৰ্টিৰ সংসদ অভিযানৰ সময়ত আৰক্ষীৰ অত্যাচাৰ আৰু অতিসক্ৰিয়তাৰ অভিযোগ তুলি তৰা গোচৰ গ্ৰহণ কৰিবলৈ সন্মতি প্ৰকাশ কৰিছে দেশৰ উচ্চতম ন্যায়ালয়ে। কেৱল সংসদ অভিযানেই নহয়, নীট কেলেংকাৰী আৰু কেন্দ্ৰীয় শিক্ষা মন্ত্ৰী ধৰ্মেন্দ্ৰ প্ৰধানৰ পদত্যাগৰ দাবীত দেশৰ বিভিন্ন প্ৰান্তত হোৱা প্ৰতিবাদত আৰক্ষীয়ে চলোৱা নিৰ্যাতনৰ কথাও এই আবেদনত উল্লেখ কৰা হৈছে। মুখ্য ন্যায়াধীশ সূৰ্য কান্তৰ নেতৃত্বত গঠিত বেঞ্চে জনায় যে অহা সোমবাৰে এই বিষয়ৰ গোচৰসমূহৰ শুনানি গ্ৰহণ কৰা হ’ব।
শুক্ৰবাৰে বিয়লি অধিবক্তা গোপাল শংকৰনাৰায়ণে মুখ্য ন্যায়াধীশৰ বেঞ্চৰ সন্মুখত সংসদ অভিযানত আৰক্ষীৰ বলপ্ৰয়োগৰ বিষয়টো তুলি ধৰে। তেওঁ আদালতক জনায় যে সমগ্ৰ দেশতে শিক্ষাৰ্থীৰ প্ৰতিবাদক কেন্দ্ৰ কৰি হিংসাত্মক ঘটনা সংঘটিত হৈছে। আৰক্ষীয়ে প্ৰতিবাদকাৰীৰ ওপৰত নিৰ্বিচাৰভাৱে বলপ্ৰয়োগ কৰিছে, যাৰ বাবে আদালতে হস্তক্ষেপ কৰাটো প্ৰয়োজনীয় হৈ পৰিছে। এই সন্দৰ্ভত আনুষ্ঠানিকভাৱে দুটাকৈ আবেদন দাখিল কৰা হৈছে আৰু সংশ্লিষ্ট ৰাজ্যসমূহকো ইয়াৰ পক্ষ কৰা হৈছে। এই সকলো দিশ বিবেচনা কৰি মুখ্য ন্যায়াধীশে সোমবাৰে গোচৰটো শুনানিৰ বাবে তালিকাভুক্ত কৰাৰ নিৰ্দেশ দিয়ে।
উল্লেখ্য যে কিছুদিন পূৰ্বে এজন অধিবক্তাই সংসদ অভিযানত আৰক্ষীৰ লাঠিচালনা আৰু কন্দুৱা গেছ প্ৰয়োগৰ ভিডিও মুখ্য ন্যায়াধীশৰ বেঞ্চত দেখুৱাব বিচাৰিছিল। কিন্তু সেই সময়ত মুখ্য ন্যায়াধীশে ভিডিও চাবলৈ অস্বীকাৰ কৰি সময় নষ্ট নকৰিবলৈ কৈছিল। আনহাতে একেটা বিষয়তে দিল্লী উচ্চ ন্যায়ালয়ে ইতিমধ্যে আৰক্ষীৰ পৰা উত্তৰ বিচাৰিছে।
ইফালে বিচাৰ প্ৰক্ৰিয়াৰ সংবেদনশীল দৃশ্য সামাজিক মাধ্যমত প্ৰচাৰ কৰি আদালতৰ মৰ্যাদা হানি কৰাৰ বিৰুদ্ধেও উচ্চতম ন্যায়ালয়ে কঠোৰ স্থিতি গ্ৰহণ কৰিছে। আদালতে স্পষ্ট কৰি দিয়ে যে আদালত কোনো ২৪ ঘণ্টা চলি থকা বিনোদনৰ চেনেল নহয়। সেয়েহে আদালতৰ অনুমতি অবিহনে বিচাৰ প্ৰক্ৰিয়াৰ কোনো অডিঅ’ বা ভিডিও সামাজিক মাধ্যমত প্ৰচাৰ কৰিব নোৱাৰিব।
