অসমৰ ৰাজনৈতিক ক্ষেত্ৰত আজি পৰ্য্যন্ত মিলন নঘটিলেও চিৰাঙত কাৰ্বন ৰিচ’ৰ্চ নামৰ উদ্যোগটোৱে সৃষ্টি কৰা ভয়াৱহ প্ৰদূষণৰ বিৰুদ্ধে দৃঢ় স্থিতিৰে একেসুৰত প্ৰতিবাদ কৰিছে দুই নেতা অখিল গগৈ আৰু হাগ্ৰামা মহিলাৰী নেতৃত্বাধীন সংগঠনে।
চিৰাঙৰ ধালিগাওঁস্থিত উদ্যোগটোৱে “চৌপাশৰ জনবসতিপূৰ্ণ এলেকাসমূহ প্ৰদূষিত কৰি তুলিছে” বুলি অভিযোগ কৰি ধাৰাৱাহিক প্ৰতিবাদত নামিছে বিপিএফ-ৰ জিলা সমিতি। আৰু উদ্যোগসৃষ্ট প্ৰদূষণৰ “নীৰৱ দৰ্শক হৈ” নথকাৰ হুংকাৰ দিছে কৃষক মুক্তি সংগ্ৰাম সমিতিৰ বঙাইগাওঁ জিলা সমিতিৰ সম্পাদক নন্দন দেবনাথে।
বিপিএফ-ৰ নেতৃত্বত ৮ম দিনত ভৰি দিয়া স্থানীয় ৰাইজৰ প্ৰতিবাদত বন্ধ ৰাখিবলৈ বাধ্য হোৱা ভয়াৱহ “প্ৰদূষণকাৰী” উদ্যোগটোৰ কাম-কাজ মুকলি কৰিছে জিলা প্ৰশাসনে। লগতে চিৰাং প্ৰশাসনে বুধবাৰে ভাৰতীয় দণ্ডবিধিৰ ১৪৪ ধাৰাও জাৰি কৰিছে।
কিন্তু নাচোৰবোন্দা প্ৰতিবাদকাৰীসকলে উদ্যোগটোৰ মুখ্য দ্বাৰৰ পৰা কিছু দূৰৈত অব্যাহত ৰাখিছে প্ৰতিবাদী ধৰ্ণা। উদ্যোগটোৰ বিৰুদ্ধে স্থানীয় বিপিএফ নেতা পানীৰাম ব্ৰহ্মই যোৱা ২০১৬ চনতে এটা গোচৰো ৰুজু কৰিছিল বুলি জানিব পৰা গৈছে।
আনহাতে “নিৰ্বিকাৰ মনোভাৱ” প্ৰদৰ্শন কৰা প্ৰদূষণ নিয়ন্ত্ৰণ ব’ৰ্দক সকীয়নি দিছে কৃষক মুক্তি সংগ্ৰাম সমিতিয়ে। ধালিগাঁৱৰ বাহিৰেও সুন্দৰী আৰু নিউ বঙাইগাঁৱত থকা প্ৰদূষণ সৃষ্টিকাৰী উদ্যোগসমূহকো শীঘ্ৰে নাকী লগোৱাৰ বাবে অসম চৰকাৰ আৰু প্ৰদূষণ নিয়ন্ত্ৰণ ব’ৰ্দক দাবী জনাইছে সংগঠনটোৰ নেতা নন্দন দেবনাথে।
লক্ষণীয়ভাৱে প্ৰদূষণ নিয়ন্ত্ৰণ ব’ৰ্দৰ ১২ জনীয়া এটা দলে বৃ্হস্পতিবাৰে উদ্যোগটো পৰিদৰ্শন কৰি “প্ৰদূষণৰ মাত্ৰা পৰীক্ষা” কৰিছিল। দলটোৰ মতে তেওঁলোকৰ প্ৰতিবেদনতে তেওঁলোকে পোৱা সকলো তথ্য উল্লেখ কৰা হৈছে।
কিন্তু সূত্ৰ অনুসৰি দলটোৱে পৰিদৰ্শন কৰা নাছিল অভিযুক্ত উদ্যোগটোৰ গুদাম য’ত ধালিগাঁৱৰ উদ্যোগটোৰ লগতে নিউ বঙাইগাঁৱৰ ব্ৰহ্মপুত্ৰ কাৰ্বন লিমিটেদ নামৰ আন এটা উদ্যোগেও জমা ৰাখিছে বৃহৎ পৰিমাণৰ কেঁচা পে’ট্ৰলিয়াম ক’ক (Raw Petroleum Coke)। এই সামগ্ৰী পানী আৰু ভূ-পৃষ্ঠৰ ভয়াৱহ প্ৰদূষক।
