আজি বিয়লিৰ ভাগত উজনি অসমৰ বিভিন্ন অঞ্চলৰ লগতে তিনিচুকীয়া জিলাত প্ৰবল শিলাবৃষ্টি হয়৷ জিলাখনৰ কাকপথাৰ, ডিৰাক, পেঙেৰি, বৰডুমচা, মাৰ্ঘেৰিটা, তিনিচুকীয়া নগৰৰ লগতে ইয়াৰ উপকণ্ঠ অঞ্চলত সন্ধ্যাৰ সময়লৈকে হোৱা প্ৰবল শিলাবৃষ্টিৰ ফলত ৩৭নং ৰাষ্ট্ৰীয় ঘাইপথ আৰু কাকপথাৰৰ ৫২ নং ৰাষ্ট্ৰীয় ঘাইপথৰ অঞ্চল ভেদে সম্পূৰ্ণ শিলাবৃষ্টিৰে ভৰি পৰে৷
ফলত প্ৰায় দুঘণ্টাৰ বাবে বিভিন্ন অঞ্চলত যান-বাহন চলাচল বন্ধ হৈ পৰা বুলি জানিব পৰা গৈছে।
আনহাতে ফাগুন মাহৰ প্ৰথমজাক বৰযুণৰ লগতে শিলাবৃষ্টিত জিলাখনৰ পথাৰৰ শষ্যসমূহৰো বিস্তৰ ক্ষতি হোৱাৰ সম্ভৱনা আছে। আজি হঠাতে অহা প্ৰবল বৃষ্টিপাতে বিপৰ্যস্ত কৰি তোলে তিনিচুকীয়া জিলাৰ কেইবাটাও প্ৰান্তৰ জনজীৱন।
আঞ্চলিক বতৰ-বিজ্ঞান কেন্দ্ৰৰ আগজাননী অনুসৰি ঘণ্টাত ৫০ কিঃ মিঃ বেগত বলিব বতাহ। তিনিচুকীয়া, ডিব্ৰুগড় আৰু ধেমাজি জিলাত ইয়াৰ প্ৰভাৱ পৰিব৷
আধা ঘণ্টাৰ পৰা তিনি ঘণ্টা পৰ্যন্ত নিশালৈ বিজুলী ঢেৰেকনিৰে প্ৰবল বৃষ্টিপাত হোৱাৰো সম্ভাৱনা আছে বুলি বতৰ-বিজ্ঞান কেন্দ্ৰৰ পৰা জনোৱা হৈছে৷
