নামাজৰ সময়ত সৃষ্টি হোৱা এটা সাম্প্ৰদায়িক সংঘৰ্ষৰ পিছত যোৱা ১০ মে’ৰ পৰা বলৱৎ হৈ থকা সান্ধ্য আইন হাইলাকান্দিত কিছু শিথিল কৰা হৈছে। ১৪ মে’ৰ পৰা কেৱল নিশাহে সান্ধ্য আইন বলৱৎ থাকিব। আজিও তিনি বজালৈ সান্ধ্য আইন শিথিল কৰা হৈছে।
আনহাতে একে সময়ৰ পৰা বন্ধ হৈ থকা ইণ্টাৰনেট সেৱাও ১৪ মে’ৰ পৰা সম্পূৰ্ণ খোলা দিয়া হ’ব। জিলাখনৰ উপায়ুক্ত কীৰ্থী জল্লীয়ে আজি সংবাদ মাধ্যম সম্বোধন কৰি এই কথা জানিবলৈ দিয়ে।
আজি বৰাক উপত্যকাৰ চহৰখনত উপায়ুক্তগৰাকীয়ে স্থানীয় জ্যেষ্ঠ লোক, ৰাজনৈতিক নেতা আৰু দল-সংগঠনৰ সৈতে এখন আলোচনাসভা অনুষ্ঠিত কৰে। সভাখন সম্বোধন কৰি উপায়ুক্তগৰাকীয়ে কয়, “কিছুমান অপশক্তিয়ে সমাজত শান্তি বিঘ্নিত কৰিবলৈ আৰু সম্প্ৰীতি বিনষ্ট কৰিবলৈ অপচেষ্টা কৰি আছে।”
তেওঁ শান্তি বৰ্তাই ৰখাৰ বাবে জ্যেষ্ঠ নাগৰিক, দল-সংগঠন আৰু সকলো স্তৰৰ নাগৰিকৰ সহযোগিতা আৰু সমৰ্থন বিচাৰে। সভাত জিলাখনৰ আৰক্ষী অধীক্ষক মহনীশ মিশ্ৰও উপস্থিত থাকে।
সান্ধ্য আইন শিথিল কৰা হৈছে যদিও সম্পূৰ্ণ উঠাই লোৱা হোৱা নাই। পৰৱৰ্তী ১০ দিনৰ বাবে নিশাৰ ভাগত নিয়ম বাহাল থাকিব বুলি জনালে উপায়ুক্তগৰাকীয়ে।
উল্লেখযোগ্য যে যোৱা ১০ মে’ত নামাজৰ সময়ত কিছু সংখ্যক দুৰ্বৃত্তই উদ্ভণ্ডালি কৰি নামাজৰ সময়ত ৰখাই থোৱা বহুকেইখন মটৰ চাইকেলৰ ছীট কাটি থৈ যোৱাৰ পিছতে দুটা ফৈদৰ মাজত কাজিয়াৰ সূত্ৰপাত হৈছিল। ই ক্ৰমে ভয়ংকৰ ৰূপ লৈ মাৰপিট, শিল দলিওৱাত পৰিণত হয়।
পৰিস্থিতি নিয়ন্ত্ৰণৰ বাবে আৰক্ষীয়ে গুলী চালনা কৰাৰ ফলত জমিৰ উদ্দিন তপদাৰ নামৰ এজন লোকৰ মৃত্যু হোৱাৰ লগতে কেইবাজনো আহত হৈছিল।
ইয়াৰ পিছতে অধিক হিংসা নিবিয়পিবলৈ চৰকাৰ তথা প্ৰশাসনে সান্ধ্য আইন জাৰি কৰাৰ লগতে ইণ্টাৰনেট সেৱা বন্ধ কৰি দিছিল।
যোৱা দুদিনত পৰিস্থিতি ক্ৰমে স্বাভাৱিক হোৱা বাবে প্ৰশাসনে স্বাভাৱিক জনজীৱনৰ স্বাৰ্থত এই নিৰ্দেশত শিথিলতা আনিবলৈ সিদ্ধান্ত লয়।
আনহাতে উপায়ুক্তগৰাকীয়ে জনোৱা মতে, চৰকাৰে এতিয়াও কাকো আটক বা গ্ৰেপ্তাৰ কৰা নাই যদিও কেইবাটাও গোচৰ ৰুজু কৰা হৈছে আৰু পৰ্য্যায়ক্ৰমে সেইবোৰৰ তদন্ত চলাই নিয়া হ’ব।
ছ’চিয়েল মিডিয়াৰ পোষ্টৰ ওপৰতো প্ৰশাসনে চোকা নজৰ দিব বুলি জানিব পৰা গৈছে।
