ভাৰতে হৰ ঘৰ ত্ৰিৰংগা অভিযানৰ সৈতে আজাদী কা অমৃত মহোৎসৱ উদযাপনকৰি আছে৷ এনেসময়ে হাৰিয়ানাৰ একাংশ লোকে ঝাজ্জৰত ৬,৬০০ ফুট দীঘল ত্ৰিৰংগা লৈ ৰেলী উলিয়ায়।
ৰেলীটোত পুৰুষ, মহিলা আৰু শিশুসকলে আনন্দ মনেৰে অংশগ্ৰহণ কৰা দেখা যায়৷ সমদলত ভাগ লোৱাসকলে বন্দে মাতৰম আৰু ভাৰত মাতা কী জয় শ্লোগানেৰে ৬,৬০০ ফুট দীঘল ত্ৰিৰংগা কঢ়িয়াই নিয়ে। ত্ৰিৰংগা যাত্ৰা আজাদী কা অমৃত মহোৎসৱ উদযাপনৰ এটা অংশ । প্ৰধানমন্ত্ৰী নৰেন্দ্ৰ মোদীয়ে স্বাধীনতা দিৱসৰ পূৰ্বে হৰ ঘৰ ত্ৰিৰংগা কাৰ্যসূচী সাফল্যমণ্ড়িত কৰিবলৈ দেশবাসীক আহ্বান জনাইছিল ৷
মোদীয়ে সকলোকে তেওঁলোকৰ নিজৰ ঘৰত ৰাষ্ট্ৰীয় পতাকা উত্তোলন কৰিবলৈও আহ্বান জনাইছিল৷ ইপিনে দেওবাৰে তিনিজন কেন্দ্ৰীয় মন্ত্ৰী আৰু দিল্লীৰ লেফটেনেণ্ট গভৰ্ণৰে এনডিএমচি বিদ্যালয়ৰ ১০ হাজাৰ শিক্ষাৰ্থীৰ সৈতে আন এটা সমদলত অংশগ্ৰহণ কৰে। এই সমদল জনপথ ৰাদিয়ালৰ পৰা আৰম্ভ হৈছিল আৰু ইণ্ডিয়া গেটৰ ৰাষ্ট্ৰীয় যুদ্ধ স্মাৰকত সমাপ্ত হৈছিল। কেন্দ্ৰীয় মন্ত্ৰী পীয়ুষ গোৱেল, স্মৃতি ইৰাণী আৰু মীনাক্ষী লেখিয়ে অনুষ্ঠানটোত অংশগ্ৰহণ কৰে।
দিল্লীৰ লেফটেনেণ্ট গভৰ্ণৰ বিনয় কুমাৰ চাক্সেনা, নতুন দিল্লী পৌৰ নিগমৰ অধ্যক্ষ অশ্বিনী কুমাৰ, এন ডি এম চি কুলজিৎ সিং চাহাল আৰু বিশাখা চাইলানিৰ সদস্যসকলেও এই পদযাত্ৰাত অংশগ্ৰহণ কৰে। দেওবাৰে জম্মু-কাশ্মীৰৰ বাৰামুলাৰ হাইদৰবেইগত ১০৮ ফুট ওখ ৰাষ্ট্ৰীয় পতাকা উত্তোলন কৰা হয়৷উত্তৰ কাশ্মীৰত এনে ধৰণে জাতীয় পতাকা উত্তোলনৰ ঘটনা এয়াই প্ৰথম। অনুষ্ঠানটোত সাংবাদিকৰ সৈতে বাৰ্তালাপৰ সময়ত জিঅ’চি কিলো ফ’ৰ্চৰ মেজৰ জেনেৰেল এছ এছ শ্লাৰিয়াই ‘হৰ ঘৰ ত্ৰিৰংগা’ অভিযানলৈ সমৰ্থন জনোৱা বাবে কাশ্মীৰবাসীক ধন্যবাদ জনায়৷
