অৱশেষত আৰক্ষীয়ে প্ৰাক্তন ক্ৰিকেটাৰ হৰভজন সিং, যুৱৰাজ সিং আৰু সুৰেশ ৰাইনাৰ বিৰুদ্ধে দেশৰ ১০ কোটি দিব্যাংগক ‘উপহাস’ কৰাৰ অভিযোগত গোচৰ ৰুজু কৰিছে। ভাইৰেল হোৱা এটা ভিডিঅ’ত প্ৰাক্তন ক্ৰিকেটাৰ তিনিগৰাকীয়ে দিব্যাংগ লোকসকলক ঠাট্টা কৰা দেখা গৈছে।এই ভিডিঅ’ ভাইৰেল হোৱাৰ পাছৰে পৰা দেশজুৰি সকলো স্তৰতে সমালোচনাৰ ধুমুহা বলিছে।
ঘটনাৰ পাছত ক্ৰিকেটাৰসকলে ব্যক্তিগতভাৱে ক্ষমা খুজিছিল যদিও নেশ্যনেল কাউন্সিল ফৰ প্ৰমোচন অৱ ডিজেবল’ড পিপলৰ ৰাষ্ট্ৰীয় আহ্বায়ক আৰমান আলীয়ে প্ৰাক্তন ক্ৰিকেটাৰসকলৰ বিৰুদ্ধে এজাহাৰ দাখিল কৰে। তেওঁ কয় যে এই তিনিজন বিশিষ্ট ব্যক্তিয়ে দেশৰ ১০ কোটি লোকক যি ধৰণে হাঁহিয়াতৰ পাত্ৰলৈ ৰূপান্তৰিত কৰিছে সেয়া অতি নিন্দনীয়। ইয়াৰ ফলত দিব্যাংসকলৰ আত্মসন্মান লাঘৱ হৈ পৰিছে। কেৱল সেয়াই নহয়, যদি এনে আদৰ্শবাদী লোকে বিশেষভাৱে সক্ষম লোকসকলক এনে ব্যৱহাৰ কৰে, তেন্তে ই আনৰ বাবে কেনে বাৰ্তা দিব?
দিল্লীৰ অমৰ কলনী আৰক্ষী থানাত দাখিল কৰা এই এজাহাৰত ইনষ্টাগ্ৰামৰ বিৰুদ্ধেও অভিযোগ উত্থাপন হৈছে। ইয়াৰ মালিকীস্বত্ব গোট মেটাৰ বিৰুদ্ধে আই টি আইন উলংঘা কৰাৰ অভিযোগ উত্থাপন হৈছে।
আম আদমি পাৰ্টীৰ ৰাজ্যসভাৰ সদস্য হৰভজন সিঙে ছ’চিয়েল মিডিয়াত ধুমুহাৰ সৃষ্টি কৰাৰ পাছতে ভিডিঅ’ পোষ্টটো ডিলিট কৰে আৰু ক্ষমা খুজে৷ হৰভজনে স্পষ্টীকৰণ দি কয় যে এই বয়সতো হাড়ৰ ১৫ দিন ক্ৰিকেট খেলাৰ ক্ষমতা আছে বুলি দেখুৱাবলৈ তেওঁলোকে এই কাম কৰিছিল। কাকো অপমান কৰাটো তেওঁলোকৰ উদ্দেশ্য নাছিল।
