ৰামদেৱৰ মুখত হাঁহি! : এক লক্ষ ৰোগীক ‘ক’ৰোনিল’ দিব এখন ৰাজ্যৰ চৰকাৰে; কোন চৰকাৰে?
কৰোনাকালীন পৰিস্থিতিত দেশত বিতৰ্কৰ সূত্ৰপাত কৰা ৰামদেৱৰ মুখত হাঁহি বিৰিঙাবলৈ আগবাঢ়িছে এখন ৰাজ্যৰ বিজেপি চৰকাৰে।
ৰামদেৱৰ প্ৰতিষ্ঠান পতঞ্জলিয়ে প্ৰস্তুত কৰা বিতৰ্কিত কৰোনা ভেকচিন কৰ’লিনৰ প্ৰায় এক লাখ ড’জ ৰোগীক প্ৰদান কৰাৰ সিদ্ধান্ত গ্ৰহণ কৰিছে হাৰিয়ানাৰ চৰকাৰে।
সোমবাৰে ৰাজ্যখনৰ স্বাস্থ্যমন্ত্ৰী অনিল ভিজে টুইটাৰ যোগে এই সিদ্ধান্তৰ কথা প্ৰকাশ কৰিছে। স্বাস্থ্যমন্ত্ৰীগৰাকীয়ে প্ৰকাশ কৰা অনুসৰি হাৰিয়ানা চৰকাৰে কৰোনা ৰোগীক বাবা ৰামদেৱে প্ৰস্তুত কৰা ক’ৰোনিল প্ৰতিষেধকটি এক লক্ষ কৰোনা ৰোগীক বিনামূলীয়াকৈ প্ৰদান কৰিব।
প্ৰতিষেধকৰ খৰচ হাৰিয়ানা চৰকাৰ আৰু ৰামদেৱৰ প্ৰতিষ্ঠান পতঞ্জলিয়ে বহন কৰিব বুলিও প্ৰকাশ কৰিছে স্বাস্থ্যমন্ত্ৰী অনিল ভিজে।
স্মৰ্তব্য যে ৰামদেৱৰ কৰ’লিনক কৰোনাৰ প্ৰতিষেধক হিচাপে দাবী কৰি আহিলেও কোনো গৱেষণা প্ৰতিষ্ঠানে ইয়াক স্বীকৃতি প্ৰদান কৰা নাই। প্ৰতিষেধকবিধ বিজ্ঞানসন্মতভাৱে প্ৰস্তুত কৰা হোৱা নাই বুলি স্বীকৃতি প্ৰদান কৰা হোৱা নাই।
হাৰিয়ানা চৰকাৰে প্ৰায় ১ লাখ লোকক এই প্ৰতিষেধক বিনামূলীয়াকৈ প্ৰদান কৰাৰ সিদ্ধান্ত লোৱা বুলি প্ৰকাশ পোৱাৰ পিছতে সমগ্ৰ দেশজুৰি পুনৰ বিতৰ্কৰ সূত্ৰপাত হৈছে।
উল্লেখ্য যে যোৱা ফেব্ৰুৱাৰীত কেন্দ্ৰীয় স্বাস্থ্য মন্ত্ৰী ডাঃ হৰ্ষ বৰ্ধনৰ উপস্থিতিত ৰামদেৱৰ ক’ৰোনিল বজাৰৰ বাবে মুকলি কৰিলেও বিশ্ব স্বাস্থ্য সংস্থা(WHO)ই ইয়াক স্বীকৃতি প্ৰদান কৰা নাছিল আৰু ৰামদেৱৰ বিৰুদ্ধে গোচৰ ৰুজু কৰি মাদ্ৰাজ উচ্চ ন্যায়ালয়ে জৰিমনাও বিহিছিল।