কোনোধৰণৰ বিতৰ্কত সাঙোৰ খাই নপৰা এ.আৰ. ৰহমান শেহতীয়াকৈ এটা মন্তব্যৰ জৰিয়তে চৰ্চালৈ আহিছে।
চেন্নাইত ‘নাইনটি নাইন চংছ’ নামৰ চিনেমাখনৰ অডিঅ’ মুকলি অনুষ্ঠানত এংকৰগৰাকীয়ে হিন্দীত কথা কোৱাৰ বাবে এ.আৰ. ৰহমানে তেওঁক উদ্দেশ্যি তীৰ্যক মন্তব্য আগবঢ়ায়।
অস্কাৰ বিজয়ী সংগীত পৰিচালকজনে প্ৰথমবাৰৰ বাবে প্ৰযোজনা কৰা সাংগীতিক চিনেমাখনৰ অনুষ্ঠানটোত অভিনেতা এহান ভাটক অনুষ্ঠানৰ এংকৰজনে হিন্দীত কথা কোৱাৰ বাবে ৰহমানে মঞ্চ এৰি যাবলৈ উলায়।
মঞ্চ এৰি যাবলৈ উলোৱাৰ পূৰ্বে ৰহমানে আচৰিত হৈ এংকৰগৰাকীক সুধিছিল- ”হিন্দী? তোমাক মই সোধা নাছিলোনে যে তুমি তামিল ভাষাত কথা কোৱা নে নোকোৱা?”
পাছত, ৰহমানে হাঁহে আৰু কয় যে তেওঁ ধেমালি কৰিছে।
এংকৰগৰাকীয়েও কথাটো সাধাৰণভাৱে লয় আৰু কয় যে এহান ভাটক হিন্দীত কেৱল তেওঁ আদৰণিহে জনাইছিল।
উল্লেখযোগ্য যে এআৰ ৰহমানৰ নিজা ৰাজ্য তামিলনাডুত হিন্দী ভাষাৰ বিৰুদ্ধে প্ৰবল জনমত আছে।
ৰাজ্যখনত হিন্দী ভাষাৰ আধিপত্যৰ বিৰুদ্ধে পূৰ্বে বহুতো চেলিব্ৰেটি আৰু নাগৰিকে মাত মাতি আহিছে।
এই ঘটনাটোৰ ভিডিঅ’টো সামাজিক মাধ্যমত ভাইৰেল হৈ পৰিছে।
উল্লেখযোগ্য যে এআৰ ৰহমানে তেওঁৰ প্ৰযোজনা সংস্থা ‘ৱাইএম মভিজ’ৰ দ্বাৰা নিৰ্মাণ কৰা ‘নাইনটি নাইন চংছ’ৰ চিত্ৰনাট্যও লিখিছে।
বিশেষ কৃষ্ণমূৰ্তিয়ে পৰিচালনা কৰা চিনেমাখনত অভিনয় কৰিছে এহান ভাট আৰু এডিলছী ভাৰ্গাছে।
চিনেমাখন ১৬ এপ্ৰিলত মুক্তি লাভ কৰিব।
