বতৰ বিজ্ঞান বিভাগৰ আগজাননী: শীঘ্ৰেই ধাৰাসাৰ বৰষুণৰ কবলত পৰিব অসমসহ উত্তৰ-পূব ভাৰত

আগন্তুক কেইদিনমানত অসমকে ধৰি উত্তৰ-পূবৰ ৰাজ্যসমূহত ধাৰাসাৰ বৰষুণ হোৱাৰ সম্ভাৱনা আছে। আজি ভাৰতীয় বতৰ বিজ্ঞান বিভাগে (আইএমডি) এক বিবৃতি যোগে এই আগজাননী কৰিছে।

বৰষুণৰ লগতে মঙলবাৰ, শুক্ৰবাৰ আৰু শনিবাৰে অসম, মেঘালয়, নাগালেণ্ড, মণিপুৰ, মিজোৰাম আৰু ত্ৰিপুৰাত ধুমুহা আৰু বজ্ৰপাত হোৱাৰ সম্ভাৱনা আছে বুলিও বিভাগে উল্লেখ কৰিছে।

ভাৰতীয় বতৰ বিজ্ঞান বিভাগে তীব্ৰ বৰষুণৰ আশংকাত মঙলবাৰ, শুক্ৰবাৰ আৰু শনিবাৰৰ বাবে সমগ্ৰ উত্তৰ-পূবৰ ওপৰত হালধীয়া সতৰ্কীকৰণ জাৰি কৰিছে।

বিভাগে বিবৃতিটোত লগতে উত্তৰ-পূবৰ জনসাধাৰণক স্থানীয় বতৰৰ পৰিস্থিতিৰ সন্দৰ্ভত সজাগ হ’বলৈও আহ্বান জনাইছে।

আনহাতে বৰষুণৰ পূৰ্বানুমান স্বত্বেও সমগ্ৰ উত্তৰ-পূবত দিনৰ তাপমাত্ৰা স্বাভাৱিকতকৈ অধিক থকাৰ সম্ভাৱনা আছে বুলি ‘The Weather Channel’ ৰ প্ৰতিবেদনত প্ৰকাশ পাইছে।

উল্লেখ্য যে উত্তৰ-পূৰ্বাঞ্চলত এতিয়ালৈকে বাৰিষা ঋতু হোৱা বৰষুণৰ গড়তকৈ কম বৰষুণ নথিভুক্ত হৈ আছে। গতিকে বিভাগে আগজাননী কৰাৰ দৰেই এই সপ্তাহত ধাৰাসাৰ বৰষুণ হোৱাৰ সম্ভাৱনা আছে।