অহা ২৪ ঘন্টাত অসম আৰু মেঘালয়ত বিজুলী ঢেৰেকনি আৰু প্ৰচণ্ড ধুমুহাৰ লগতে ধাৰাসাৰ বৰষুণ হোৱাৰ সম্ভাৱনা আছে।
ভাৰতীয় বতৰ বিজ্ঞান বিভাগে ইয়াৰ শেহতীয়া সৰ্বভাৰতীয় বতৰ সম্পৰ্কীয় তথ্য তথা আগলি বতৰা অনুসৰি বিজুলী ঢেৰেকনিৰ সৈতে প্ৰবল ধুমুহাই (ঘন্টাত ৩০-৪০ কি:মি: গতিত) ছিকিম, অসম, মেঘালয়, নাগালেণ্ড, মণিপুৰ, মিজোৰাম আৰু ত্ৰিপুৰাৰ বিভিন্ন অংশক জোকাৰি যোৱাৰ সম্ভাৱনা আছে।
তদুপৰি, নাগালেণ্ড, মণিপুৰ, মিজোৰাম আৰু ত্ৰিপুৰাৰ বিভিন্ন প্ৰান্তত প্ৰবল বৰষুণ হ’ব। সেইদৰে অসম আৰু মেঘালয়ৰ বিভিন্ন অঞ্চলতো ধাৰাসাৰ বৰষুণ হোৱাৰ সম্ভাৱনা আছে বুলি প্ৰতিবেদনত কোৱা হৈছে।
উত্তৰ-পূৰ্বাঞ্চলৰ ৰাজ্যসমূহ বাৰিষাৰ আগে আগে আৰু বাৰিষা কালত সদায় প্ৰাকৃতিক দুৰ্যেগৰ বলি হৈ আহিছে। যোৱা মাহত অহা ফনি ঘূৰ্ণী বতাহে অসম আৰু মেঘালয়ত কেইবাশ ঘৰ ভাঙি বিধ্বস্ত কৰিছিল।
যদিওবা প্ৰাক্ বাৰিষাৰ সময়ছোৱাত উত্তৰ-পূৰ্বাঞ্চলত ১৪ শতাংশ বৰষুণ ঘাটি হৈ আছে, বাৰিষা বৰষুণৰ পৰিমান বৃদ্ধি খেতিয়কৰ বাবে উপযোগী হৈ পৰিব।
