চতুৰ্থবাৰৰ বাবে ঝাৰখণ্ডৰ মুখ্যমন্ত্ৰী হিচাপে শপত গ্ৰহণ কৰে হেমন্ত ছ’ৰেনে।
বৃহস্পতিবাৰে আবেলি ৪ বজাত তেওঁ ঝাৰখণ্ডৰ মুখ্যমন্ত্ৰী হিচাপে শপত গ্ৰহণ কৰে।
ৰাজ্যৰ ৰাজ্যপাল সন্তোষ কুমাৰ গংগৱাৰে হেমন্ত ছ’ৰেনক শপত গ্ৰহণ কৰোৱায়। ৰাঁচীৰ মোৰাবাদী ময়দানত হেমন্ত ছ’ৰেনৰ শপতগ্ৰহণ অনুষ্ঠানত উপস্থিত থাকে ইণ্ডিয়া মিত্ৰজোঁটৰ শীৰ্ষ নেতাসকল।
বৃহস্পতিবাৰে বিয়লি ঝাৰখণ্ডৰ মুখ্যমন্ত্ৰী হেমন্ত ছ’ৰেনৰ শপত গ্ৰহণ অনুষ্ঠানত উপস্থিত থাকে – লোকসভাৰ বিৰোধী দলপতি ৰাহুল গান্ধী, কংগ্ৰেছৰ সভাপতি মল্লিকাৰ্জুন খৰ্গে, সমাজবাদী পাৰ্টিৰ মুৰব্বী অখিলেশ যাদৱ, পশ্চিম বংগৰ মুখ্যমন্ত্ৰী মমতা বেনাৰ্জী, আম আদমী পাৰ্টিৰ মুৰব্বী অৰবিন্দ কেজৰিৱাল, ৰাষ্ট্ৰীয় জনতা দলৰ নেতা তেজস্বী যাদৱ।
উল্লেখ্য যে এই নৱেম্বৰ মাহত ঝাৰখণ্ড আৰু মহাৰাষ্ট্ৰত একেলগে অনুষ্ঠিত হৈছিল বিধানসভা নিৰ্বাচন। ঝাৰখণ্ডত ১৩ আৰু ২০ নৱেম্বৰত অনুষ্ঠিত হৈছিল দুটা পৰ্যায়ৰ নিৰ্বাচন। আনহাতে, ২০ নৱেম্বৰত মহাৰাষ্ট্ৰৰ নিৰ্বাচন এটা পৰ্যায়ত অনুষ্ঠিত হৈছিল। দুয়োখন ৰাজ্যৰ ভোটগণনা ২৩ নৱেম্বৰত হৈছিল।
বিজেপি মিত্ৰজোঁট এন ডি এয়ে মহাৰাষ্ট্ৰ দখল কৰিছিল যদিও ঝাৰখণ্ডত ইণ্ডিয়ামিত্ৰজোঁটে জয়লাভ কৰিছিল। য’ত হেমন্ত ছ’ৰেনৰ দল ঝাৰখণ্ড মুক্তি মৰ্চাই ৮১ খন আসনৰ ভিতৰত ৩৪ খন আসন লাভ কৰে। ইয়াৰ বাহিৰেও মিত্ৰজোঁটৰ অংশীদাৰ কংগ্ৰেছে ১৬খন, আৰজেডিয়ে ৪খন আৰু চিপিআইএমএলে ২খন আসন লাভ কৰে।
