ৰাজ্য চৰকাৰ তথা অসম আৰক্ষীৰ ড্ৰাগছ বিৰোধী অভিযানক অংগুষ্ঠ প্ৰদৰ্শন কৰি এতিয়াও অসাধু চক্ৰই চলাই আছে ড্ৰাগছৰ চোৰাং বেহা। আজি অসম আৰক্ষীয়ে এক অভিযান চলাই জব্দ কৰিছে বৃহৎ পৰিমাণৰ হেৰ’ইন।
নিষিদ্ধ দ্ৰব্যখিনি ১৬৫ টা চাবোন বক্সত সোমোৱাই আনিছিল দুগৰাকী সৰবৰাহকাৰীয়ে। প্ৰায় ২.২ কিলোগ্ৰাম ওজনৰ এই হেৰ’ইনখিনিৰ মূল্য আন্ত:ৰাষ্ট্ৰীয় চোৰাং বজাৰত প্ৰায় ১৮ কোটি টকা হ’ব বুলি অনুমান কৰা হৈছে।
আৰক্ষীয়ে হেৰ’ইনখিনি জব্দ কৰাল লগতে সৰবৰাহকাৰী দুগৰাকীকো গ্ৰেপ্তাৰ কৰে। অসম আৰক্ষীয়ে সদৰী কৰা মতে, গ্ৰেপ্তাৰ কৰা লোক দুগৰাকীক আব্দুল হাছান আৰু মুস্তাক আলী বুলি চিনাক্ত কৰা হৈছে।
ধৃত দুয়োগৰাকী ব্যক্তি মণিপুৰৰ বাসিন্দা বুলি আৰক্ষীয়ে জানিবলৈ দিছে। আৰক্ষীয়ে সদৰী কৰা তথ্য অনুসৰি দুয়ো যাত্ৰা কৰি থকা এখন গাড়ীৰ পৰা হেৰ’ইন ভৰ্তি প্ৰায় ১০০ টা চাবোন বক্স প্ৰথমে উদ্ধাৰ কৰা হৈছিল।
পিছত আৰক্ষীয়ে দুয়োগৰাকীৰ বাসগৃহত অভিযান চলাই ড্ৰাগছ ভৰ্তি আন ৬৫ টা চাবোনৰ বাকচ উদ্ধাৰ কৰে।
