এথলেটিকছ চেম্পিয়নশ্বিপৰ ৪০০ মিটাৰ দৌৰৰ পৰা অপ্ৰত্যাশিত বিদায় হিমা দাসৰ
এছিয়ান এথলেটিকছ চেম্পিয়নশ্বিপৰ ৪০০ মিটাৰ দৌৰৰ পৰা অপ্ৰত্যাশিতভাৱে বাহিৰ হ’ব লগীয়া হৈছে পদক প্ৰত্যাশী অসম সন্তান হিমা দাস। আজি দোহাৰ খলিফা ষ্টেডিয়ামত অনুষ্ঠিত প্ৰথম হিটছৰ দৌৰৰ মাজতে স্প্ৰীন্টাৰগৰাকীয়ে প্ৰচণ্ড পিঠিৰ বিষত ভোগে আৰু খেলৰ আধাতে ট্ৰেক এৰিব লগীয়া হয়।
১৯ বছৰীয়া অসমৰ তাৰকা দৌৰবিদ গৰাকীয়ে বিষৰ মাজতো নিজৰ দৌৰ অব্যাহত ৰখাৰ চেষ্টা কৰিছিল যদিও বিষ ইমানেই অসহ্যকৰ আছিল যে ২০০ মিটাৰ পইণ্টত হিমা ৰৈ যায় আৰু ট্ৰেকৰ ওপৰতে শুই পৰে।
ডোহাৰ আন্তঃৰাষ্ট্ৰীয় খলিফা ইণ্টাৰনেশ্যনেল ষ্টেডিয়ামত ২১ এপ্ৰিলৰ পৰা ২৪ এপ্ৰিললৈ চলিব লগীয়া প্ৰতিযোগিতাখনত হিমাৰ প্ৰদৰ্শনৰ ওপৰত সকলোৰে দৃষ্টি নিবদ্ধ আছিল যদিও আজিৰ এই খবৰে ক্রীড়া প্ৰেমীসকলক মৰ্মাহত কৰা পৰিলক্ষিত হৈছে।
এথলেটিকছ ফেডাৰেশ্যন অব ইণ্ডিয়াই হিমাৰ আঘাত বিশেষ চিন্তনীয় নহয় বুলি জনোৱাৰ লগতে দুই এদিনতে সুস্থ হৈ উঠিব বুলি জানিবলৈ দিয়ে।
More than pain it was the feeling of letting down fans caused greater pain to Hima Das who crashed out of Women 400m heat in agony after severe cramp in the lower back at 200m point #asianathletics #Indianathletics #afi pic.twitter.com/t6lidJjga9
— Rahul PAWAR ( राहुल पवार ) (@rahuldpawar) April 21, 2019
উল্লেখযোগ্য যে, অলপতে হিমাই ফেডাৰেশ্যন কাপ এথলেটিকছ প্ৰতিযোগিতাৰ মহিলাৰ ৪০০ মিটাৰ শাখাত সোণৰ পদক দখল কৰিছিল।
ইফালে আঘাতৰ বাবে ৪০০ মিটাৰ দৌৰৰ পৰা হিমা বাহিৰ হ’লেও ফাইনেললৈ যোগ্যতা অৰ্জন কৰিছে ভাৰতৰ আন এগৰাকী স্প্ৰীন্টাৰ এম আৰ পোভাম্মা। ৪০০ মিটাৰ হিটছত বাহৰেইনৰ চালৱা নাছেৰৰ পাছতে দ্বিতীয় স্থানত থাকে পোভাম্মা।