টকিঅ’ অলিম্পিক-২০২১লৈ যোগত্যা অৰ্জন কৰিবলৈ সক্ষম হৈছে অসমৰ সুসন্তান দৌৰবিদ হিমা দাসে।
অৱশ্যে টকিঅ’ অলিম্পিকগামী ভাৰতীয় দলত হিমা দাসৰ নাম আনুষ্ঠানিকভাৱে ৰাজহুৱা কৰিবলৈ এতিয়াও বাকী আছে।
২৩ জুলাইৰ পৰা ৮ আগষ্টলৈ জাপানৰ টকিঅ’ত অলিম্পিক প্ৰতিযোগিতাখন অনুষ্ঠিত হ’ব।
২০১৮ চনত জাকাৰ্টাত অনুষ্ঠিত হোৱা এছিয়ান গেইমছৰ ৪০০ মিটাৰ শাখাত দৰ্শনীয় প্ৰদৰ্শন দাঙি ধৰাৰ পাছত হিমা দাস ককালৰ বিষত আক্ৰান্ত হৈছিল।
পৰৱৰ্তী সময়ত ক্ৰমাৎ সুস্থ হৈ উঠা হিমাই ২০১৯ চনত কেইবাখনো প্ৰতিযোগিতাত পদক দখল কৰিবলৈ সক্ষম হৈছিল।
অতি কম সময়ৰ ভিতৰত দেশৰ ক্ৰীড়া ক্ষেত্ৰত নিজৰ নাম উজলাবলৈ সক্ষম হোৱা হিমা দাসে ক্ৰীড়া ক্ষেত্ৰলৈ আগবঢ়োৱা অৱদানৰ বাবে ২০১৮ চনত অৰ্জুন বঁটা লাভ কৰে।
ক’ৰ’না মহামাৰীৰ সংক্ৰমণৰ বাবে ২০২০ বৰ্ষত অনুষ্ঠিত হ’বলগীয়া টকিঅ’ অলিম্পিক ২০২১ চনলৈ পিছুৱাই দিয়াৰ সিদ্ধান্ত গ্ৰহণ কৰা হৈছিল যিটো হিমা দাসৰ বাবে আশীৰ্বাদ স্বৰূপ হৈ পৰিল।
টকিঅ’ অলিম্পিক ২০২১ চনত অনুষ্ঠিত হোৱা বাবে হিমা দাসে আঘাতৰ পৰা সুস্থ হৈ উঠা আৰু অলিম্পিকৰ প্ৰস্তুতিৰ বাবে যথেষ্ট সময় লাভ কৰিলে।
