ভাৰতৰ আগশাৰীৰৰ ফুটবল প্ৰতিযোগিতা ইণ্ডিয়ান ছুপাৰ লীগৰ চলিত বৰ্ষৰ উদ্বোধনী খেলখনত সোমবাৰে এফ চি গোৱাৰ সৈতে মুখামুখি হ’বলগীয়া নৰ্থইষ্ট ইউনাইটেড এফ চিৰ সহযোগী স্বত্ত্বাধিকাৰী জন আব্ৰাহমৰ সৈতে ‘ফেন পাৰ্ক’ত দেখা যাব অসমৰ স্বৰ্ণকন্যা হিমা দাসক।
নৰ্থইষ্ট ইউনাইটেড এফ চিৰ অ’ফিচিয়েল টুইটাৰ পেজত লিখিছেঃ ‘’ হিমা দাসৰ সৈতে জন আব্ৰাহাম আমাৰ সৈতে থাকিব আৰু কাইলৈ খেলত ফেন পাৰ্কত দেখা যাব। ফেন কন্টেষ্টৰ ভাগ্যৱান বিজেতাই তেওঁলোকক লগ কৰাৰো সুযোগ পাব। আপোনালোকক সকলোকে এফ চি গোৱাৰ বিৰুদ্ধে আমাৰ উদ্বোধনী খেলখনত দেখা পোৱাৰ আশা থাকিল।‘’
উজ্জীৱিত নৰ্থইষ্ট ইউনাইটেড এফ চিয়ে সোমবাৰে প্ৰতিযোগিতাখনৰ শক্তিশালী প্ৰতিদ্বন্দ্বী এফ চি গোৱাৰ বিৰুদ্ধে সোমবাৰে গুৱাহাটীৰ সৰুসজাই ষ্টেডিয়ামত প্ৰথমখন খেলত অৱতীৰ্ণ হ’ব।
নৰ্থইষ্ট ইউনাইটেড এফ চিয়ে আই এছ এলৰ উদ্বোধনী খেলখনত ঘৰুৱা খেলপথাৰত দলটোৰ নতুন প্ৰশিক্ষক এলকো ছেহেটৰিৰ তত্ত্বাৱধানত খেলিব। আনহাতে এফ চি গোৱাই দ্বিতীয়বাৰৰ বাবে ইয়াৰ মুখ্য প্ৰশিক্ষক ছাৰ্গো ল’বেৰাৰ নিৰ্দেশনাত খেলখনত প্ৰতিদ্বন্দ্বিতা আগবঢ়াব।
বিগত বৰ্ষত দুয়োটা দলৰ মাজত হোৱা প্ৰতিদ্বন্দ্বিতাত নৰ্থইষ্ট ইউনাইটেড এফ চিৰ প্ৰদৰ্শন আছিল খুবেই সন্তোষজনক। তেওঁলোকে এখন খেলত বিজয় সাৱ্যস্ত কৰাৰ লগতে এখন ড্ৰ’ খেলিছিল।
নৰ্থইষ্ট ইউনাইটেড এফ চিয়ে ইয়াৰ ষ্ট্ৰাইকাৰ বাৰ্থোলমিউ অ’গবেচেৰ আক্ৰমণৰ জৰিয়তে চলিত চিজনত সজীৱ প্ৰদৰ্শন আগবঢ়োৱাৰ আশা কৰা হৈছে। নাইজেৰিয়আৰ ফুটবলাৰগৰাকীয়ে নৰ্থইষ্ট ইউনাইটেডৰ হৈ আক্ৰমণৰ গুৰি ধৰিব।
আনহাতে, নৰ্থইষ্ট ইউনাইটেড এফ চিৰ হৈ প্ৰতিৰক্ষা বিভাগ চম্ভালিবলৈ ক্ৰৱেছিয়াৰ মাটো গ্ৰেজিক আৰু মিছলাভ কমৰস্কিয়ে। মিডফিল্ডত বলৰ গতি চম্ভালিব ৰ’ৱলিন বৰ্গেছে।
