“কংগ্ৰেছ প্ৰাৰ্থী আব্দুল খালেকক ‘দুগৰাকী পত্নী বিতৰ্ক’ৰ পৰা বচাবলৈ হিমন্তৰ ফোন”
বিজেপিলৈ গৈ কংগ্ৰেছৰ ঘোৰ বিৰোধী হৈ পৰা মন্ত্ৰী হিমন্ত বিশ্ব শৰ্মাই এইবাৰ বৰপেটা লোকসভা সমষ্টিৰ কংগ্ৰেছ প্ৰাৰ্থী আব্দুল খালেকক এটা অভিযোগৰ পৰা বচোৱাৰ চেষ্টাত নামিছে। মন্ত্ৰীজনৰ বিৰুদ্ধে এই অভিযোগ এ আই য়ু ডি এফৰ সাধাৰণ সম্পাদক আমিনুল ইছলামৰ।
শুকুৰবাৰে এ আই য়ু ডি এফৰ গুৱাহাটীৰ মুখ্য কাৰ্য্যালয়ত এখন সংবাদমেলত আমিনুল ইছলামে কয় যে কংগ্ৰেছ প্ৰাৰ্থী আব্দুল খালেকৰ লগত থকা সু-সম্পৰ্কৰ বাবেই খালেকৰ বিৰুদ্ধে বৰপেটাৰ ৰিটাৰ্নিং অফিচাৰৰ ওচৰত দাখিল হোৱা এটা অভিযোগ হিমন্ত বিশ্ব শৰ্মাই ফোন কৰি নাকচ কৰাইছে।
খালেকৰ বিৰুদ্ধে দাখিল হোৱা অভিযোগটো আছিল তেওঁ মনোনয়ন পত্ৰৰ লগত দাখিল কৰা শপতনামাত মিছা তথ্য দাখিল কৰিছিল। খালেকে দুগৰাকী পত্নী থকাৰ পাছতো এগৰাকী বুলিহে শপতনামাত লিখিছে বুলি এজন নিৰ্দলীয় প্ৰাৰ্থীয়ে ৰিটাৰ্নিং অফিচাৰৰ ওচৰত অভিযোগ দাখিল কৰিছিল।
“খালেকৰ বিৰুদ্ধে মিছা তথ্য দিয়াৰ অভিযোগ দিয়াৰ পাছত সেই অভিযোগ ৰিটাৰ্নিং অফিচাৰে গ্ৰহণ কৰিছে। এই সন্দৰ্ভত আব্দুল খালেকেও শপতনামা দাখিল কৰিছে আৰু বিষয়টোৰ শুনানি হ’ব লগীয়া আছিল। কিন্তু আমি জানিব পাৰিছো হিমন্ত বিশ্ব শৰ্মাই ৰাজনৈতিক ক্ষমতা প্ৰয়োগ কৰি ৰিটাৰ্নিং অফিচাৰক ফোন কৰি এই বিষয়টো নাকচ কৰাইছে”, আমিনুল ইছলামে সংবাদমেলত কয়।
আমিনুল ইছলামে লগতে ‘কংগ্ৰেছৰ প্ৰাৰ্থীৰ বিষয়ত বিজেপিৰ মন্ত্ৰীয়ে কিয় ফোন কৰিব লগীয়া হ’ল’ বুলিও প্ৰশ্ন উত্থাপন কৰে। লগতে নামনি অসমৰ দুই কংগ্ৰেছ প্ৰাৰ্থীৰ লগত বিজেপি মন্ত্ৰী হিমন্ত বিশ্ব শৰ্মাৰ ঘনিষ্ঠতা থকা বুলিও মন্তব্য কৰে।
“নামনি অসমৰ দুইজন প্ৰাৰ্থী, ক্ৰমে বৰপেটাৰ আব্দুল খালেক আৰু ধুবুৰীৰ আবু তাহেৰ বেপাৰী হিমন্তপন্থী। আবু তাহেৰ বেপাৰী কংগ্ৰেছত আছিল, পাছত বিজেপিলৈ যায়, পাছত আকৌ কংগ্ৰেছলৈ আহে। খালেকে বিজেপিলৈ যোৱা নাই যদিও হিমন্ত বিশ্ব শৰ্মাৰ অতি ঘনিষ্ঠ”, আমিনুল ইছলামৰ দাবী।
কংগ্ৰেছৰ ভিতৰত এতিয়াও হিমন্তৰ ৰাজনীতি চলি আছে নেকি বুলি প্ৰশ্নৰ অৱতাৰণা কৰি আব্দুল খালেকে কাৰ লগত মিলি নিৰ্বাচনত অৱতীৰ্ণ হৈছে সন্দেহৰ থল আছে বুলিও আমিনুল ইছলামে কয়।