এইবাৰ গো হত্যাত সাঙুৰ খাইছে খোদ হিন্দু মহাসভাৰ এজন নেতাৰ নাম। নিজে গো বধ কৰি তিনিজন মুছলমান যুৱকৰ গাত দোষ জাপি দিবলৈ চেষ্টা কৰিছিল এইগৰাকী হিন্দু নেতাই।
অভিযোগ অনুসৰি, হিন্দু মহাসভাৰ সঞ্জয় জাট নামৰ নেতাগৰাকীৰে ব্যক্তিগত শত্ৰুতা আছিল তিনি মুছলমান যুৱকৰ। ব্যক্তিগত শত্ৰুতাৰ বাবেই এই যুৱককেইজনক ষড়যন্ত্ৰমূলক ভাবে গো বধৰ দোষ জাপি দিয়ে হিন্দু মহাসভাৰ নেতা সঞ্জয় জাটে।
আগ্ৰাৰ চট্টা অঞ্চলৰ অতিৰিক্ত আৰক্ষী আয়ুক্ত সিঙে কয়, “সঞ্জয় জাট মূল ষড়যন্ত্ৰকাৰী। ২৯ মাৰ্চৰ নিশা তেওঁৰ অনুগামী আৰু বন্ধুসকলে মেহতাব বাগ অঞ্চলত এটা গৰু বধ কৰে। তাৰপিছত গৰুটোৰ হত্যাৰ দোষ জাপি দি জিতেন্দ্ৰ কুশৱাহাক মহম্মদ ৰিজৱান, মহম্মদ নাকিম আৰু মহম্মদ শ্বানুৰ বিৰুদ্ধে গোচৰ ৰুজু কৰে। আৰক্ষীয়ে তেওঁলোকক আটক কৰি তদন্ত আৰম্ভ কৰে। পিছত তদন্তত প্ৰকাশ পায় যে এই অপৰাধৰ লগত নাম উল্লেখ কৰা অভিযুক্তসকলৰ কোনো সম্পৰ্ক নাই। অনুমান কৰিব পাৰি যে সঞ্জয়ৰ কিছুমান মানুহৰ লগত শত্ৰুতা আছিল আৰু সেয়ে তেওঁ আক্ৰোশমূলকভাবে তেওঁলোকক গোচৰটোত জড়িত কৰিব বিচাৰিছিল।”
লগতে বিষয়াগৰাকীয়ে কয় যে হিন্দু মহাসভাৰ মুখপাত্ৰ সঞ্জয়ে এই ষড়যন্ত্ৰ ৰচনা কৰিবলৈ একাংশ সংখ্যালঘু সম্প্ৰদায়ৰ লোকৰ সহায় লৈছিল।
‘‘জিতেন্দ্ৰই জেৰাৰ সময়ত আমাক মিছা কথা কোৱা বুলি ধৰা পৰিছিল। ফোন কল ৰেকৰ্ডিঙত সঞ্জয় গৰু বধ কৰা ঠাইৰ ওচৰতে আছিল। লগতে অভিযুক্ত মুছলমান ব্যক্তিসকল এমাহৰো অধিক সময় সেই স্থানলৈ যোৱাই নাছিল।’’– বিষয়াগৰাকীয়ে কয়।
৭ দিন পূৰ্বে ভুৱা অভিযোগত গ্ৰেপ্তাৰ কৰা যুৱককেইজনক শীঘ্ৰে মুকলি কৰি দিয়া হ’ব বুলি জানিবলৈ দিয়ে আৰক্ষীয়ে বিষয়াগৰাকীয়ে।
আন এজন আৰক্ষী বিষয়াই কয় যে ৰাম নৱমীৰ প্ৰাকক্ষণত সামাজিক সম্প্ৰীতি বিঘ্নিত কৰিবলৈ গৰুটো বধ কৰা হৈছিল।
