এইবাৰ ভিত্তি বৰ্ষ ’৫১ কৰাৰ নামত আন্দোলনৰ চেলু; NRC-ৰ প্ৰতিলিপি দাহ কৰা হিন্দু যুৱ ছাত্ৰ পৰিষদৰ ১০জনক আটক
অবৈধ বাংলাদেশীক লৈ ৰাজ্যখনত বৰ্তি থকা এটা দীৰ্ঘদিনীয়া অস্থিৰতাৰ সমাধান হিচাপে আজি চূড়ান্ত এন আৰ চি প্ৰকাশ হোৱা দিনটোতে ইচ্ছ্যুটোক লৈ আকৌ আন্দোলনৰ চেলু উলিয়াব খোজা হিন্দু যুৱ ছাত্ৰ পৰিষদৰ ১০জন সদস্যক আৰক্ষীয়ে আটক কৰে।
গুৱাহাটীৰ আমবাৰীত প্ৰেছ ক্লাবৰ সন্মুখত এন আৰ চি প্ৰতিলিপি দাহ কৰোতেই আটক হোৱাসকলৰ ভিতৰত সংগঠনটোৰ সভাপতি বলেন বৈশ্যও আছে। আৰক্ষীয়ে তেওঁলোকক লতাশিল থানালৈ লৈ যায়।
হিন্দুত্ববাদী সংগঠনটোৱে আজি প্ৰকাশিত এন আৰ চিক নাকচ কৰি কয়, “যিসকলে এন আৰ চিখন হ’ব লাগে বুলি জোৰ কৰি আছে, সেইসকল অসম আৰু ভাৰত ৰাষ্ট্ৰ শত্ৰু বুলি ঘোষণা কৰিছো।”
সংগঠনটোৰ মতে, এই এন আৰ চি “নাটক”খনৰ প্ৰধান “ডাইৰেক্ট”ৰ আছুৰ নেতৃত্ব। “আছুৱে ভিত্তিবৰ্ষ ৭১ কৰিবলৈ ক’ত অধিকাৰ পালে? ২০ বছৰৰ বিদেশীৰ বোজা দিলে”, সভাপতি বলেন বৈশ্যৰ প্ৰশ্ন।
সংগঠনটোৱে এন আৰ চিৰ ৰাজ্যিক সমন্বয়ক প্ৰতীক হাজেলাকো অসমীয়াৰ শত্ৰু আৰু মুখ্য ন্যায়াধীশক ৰঞ্জন গগৈক “আধুনিক বদন” আখ্যা দিয়ে।
এন আৰ চি প্ৰকাশ পোৱা আজিৰ দিনটোক হিন্দু যুৱ ছাত্ৰ পৰিষদে ক’লা দিৱস হিচাপে গণ্য কৰে।
বৈশ্যই লগতে প্ৰধান মন্ত্ৰী নৰেন্দ্ৰ মোদী আৰু অমিত শ্বাহক প্ৰত্যাহ্বান জনাই কয়, “তোমালোকে যদি অসমক ১৯৫১ চনৰ এন আৰ চি দিব নোৱৰা, তেন্তে গোটেই ভাৰতবৰ্ষত ১৯৭১ এন আৰ চি বনাই দেখুওৱা। তেতিয়াহে তোমালোকক পুৰুষ বুলি মানিম।”
সংগঠনটোৰ অভিযোগ, এন আৰ চিত লাখ লাখ মুছলমান বাংলাদেশীৰ নাম অন্তৰ্ভুক্ত হোৱাৰ বিপৰীতে লাখ লাখ হিন্দুৰ নাম উদ্দেশ্য প্ৰণোদিতভাৱে বাদ পৰিছে।