অসম চৰকাৰৰ সৈতে হিন্দুস্তান পাৱাৰ নামৰ উদ্যোগিক প্ৰতিষ্ঠানটোৱে বুজাবুজিৰ চুক্তি স্বাক্ষৰ কৰা পাছতে অসমত নবীকৰণযোগ্য শক্তি প্ৰকল্পত ৬২০ কোটি টকা বিনিয়োগৰ কথা ঘোষণা কৰিছে। সদ্য সমাপ্ত ‘এডভান্টেজ আছাম ২.০ তে এই চুক্তিৰ আনুষ্ঠানিক ৰূপায়ণ কৰা হৈছিল।
এই বিনিয়োগে অসমৰ নবীকৰণযোগ্য শক্তিৰ আন্তঃগাঁথনি শক্তিশালী কৰাৰ লক্ষ্যৰে ১০০ মেগাৱাট সৌৰশক্তিৰ কেন্দ্ৰ আৰু অত্যাধুনিক ১০০ মেগাৱাট বেটাৰী শক্তি সংৰক্ষণ ব্যৱস্থাৰ উন্নয়নৰ ওপৰত গুৰুত্ব আৰোপ কৰিব বুলি উল্লেখ কৰিছে উদ্যোগিক প্ৰতিষ্ঠানটোৱে। আৰু সৌৰ প্ৰকল্পটোৰ বাবে ৫০০ কোটি আৰু বেটাৰী সংৰক্ষণৰ বাবে ১২০ কোটি টকা ধাৰ্য কৰিছে।
প্ৰতিষ্ঠানটোৱে এক বিবৃতি অনুসৰি অসম চৰকাৰৰ সহযোগত গ্ৰহণ কৰা এই প্ৰকল্পসমূহে ৰাজ্যৰ শক্তিৰ পৰিস্থিতি বৃদ্ধি কৰা লগতে ৫,০০০ৰো অধিক কৰ্মসংস্থাপনৰ সৃষ্টি কৰিব বুলি উল্লেখ কৰিছে।
হিন্দুস্তান পাৱাৰৰ শেহতীয়া বিনিয়োগে ৰাজ্যখনৰ গতানুগতিক শক্তিৰ উৎসৰ ওপৰত নিৰ্ভৰশীলতা হ্ৰাস কৰা আৰু ভৱিষ্যতৰ শক্তিৰ চাহিদা পূৰণৰ বাবে অত্যাধুনিক প্ৰযুক্তি গ্ৰহণত গুৰুত্ব পূৰ্ণ ভুমিকা পালন কৰিব বুলি অসম চৰকাৰে আশা প্ৰকাশ কৰিছে।
