অতিথি পৰায়ণতাৰ বিৰল নিদৰ্শন। কামৰূপৰ বামুন্দীত এইবেলিও ৫ মাঘৰ দিনা অনুষ্ঠিত হল ২০০ বছৰীয়া ঐতিহাসিক সভা গন্ধ সিধা দিয়া উৎসৱ।
কিন্তু কি এই সভা গন্ধ সিধা দিয়া উৎসৱ? এই উৎসৱৰ তাৎপৰ্য হল অতিথি আপ্যায়ন- দিনৰ ভাগত সমূহীয়া ভাবে কৰা মৎস্য চিকাৰৰ মাছ, বামুন্দীৰ ১২০০ ঘৰ গৃহস্থই দিয়া বিভিন্ন সামগ্ৰী ভঁৰালত একগোট কৰি সন্ধিয়াৰ ভাগত সভাত উপস্থিত হোৱা অসমৰ ভিন্ন প্ৰান্তৰ অতিথিক প্ৰদান কৰা হয় সিধা।
এই সিধাত চাউলৰ পৰা মছলালৈ, পাচলিৰ পৰা খৰিলৈ সকলো প্ৰদান কৰা হয় ।
লগতে বিলৰ মাছ। বছৰ বছৰ ধৰি প্ৰজন্মৰ পাছত প্ৰজন্মই এই উৎসৱ পালন কৰি আহিছে। এইবেলিও কভিড পৰিস্থিতিৰ মাজেৰে অনুষ্ঠিত হল ঐতিহাসিক সভা গন্ধ উৎসৱ।
শীতৰ নিশা অসমৰ বিভিন্ন প্ৰান্তৰ পৰা অহা ভক্তই এইদৰে শাৰী পাতি ললে সিধা।
কেৱল এয়াই নহয় সভাৰ দিনা বামুন্দীৰ প্ৰতিঘৰৰ চোতাল আপোনাৰ বাৱে সাজু থাকে আপুনি এসাজ বনাই খাবলৈ বামুন্দীৰ কোনো এঘৰলৈ গলেই আপোনাক এসাজ খাবলৈ সকলো সাজু কৰি দিব গৃহস্থই!
এই পৰম্পৰাৰে আজিও অনুষ্ঠিত হৈ আহিছে অতিথি আদৰাৰ ঐতিহাসিক উৎসৱ।
