দিল্লীৰ মুখ্যমন্ত্ৰী তথা আম আদমি পাৰ্টীৰ মুৰব্বী অৰবিন্দ কেজৰিৱালৰ গ্ৰেপ্তাৰক লৈ কেৱল দেশতে নহয়, আন্তঃৰাষ্ট্ৰীয় পৰ্যায়তো ব্যাপক প্ৰতিক্ৰিয়াৰ সৃষ্টি কৰিছে। কেজৰিৱালৰ গ্ৰেপ্তাৰৰ লগতে কংগ্ৰেছৰ বেংক একাউণ্ট বন্ধ কৰাক লৈ ইতিপূৰ্বে সৰৱ হৈছে আমেৰিকা আৰু জাৰ্মানীয়ে।
এই বিষয়ত শেহতীয়াকৈ প্ৰতিক্ৰিয়া প্ৰকাশ কৰিছে ৰাষ্ট্ৰসংঘই। ভাৰতত শেহতীয়া ৰাজনৈতিক অস্থিৰতা সন্দৰ্ভত এক প্ৰশ্নৰ উত্তৰত ৰাষ্ট্ৰসংঘই কয় যে ভাৰতসহ অন্যান্য ৰাষ্ট্ৰৰ এই নিৰ্বাচনৰ সময়ছোৱাত ৰাষ্ট্ৰসংঘই নাগৰিকৰ ৰাজনৈতিক আৰু নাগৰিক অধিকাৰৰ সুৰক্ষাৰ আশা কৰিছে।
ৰাষ্ট্ৰসংঘৰ সচিব প্ৰধান এণ্টনিঅ’ গুটেৰেছৰ মুখপাত্ৰ ষ্টেফান ডুজাৰিকে এখন সংবাদমেলত এই মন্তব্য কৰিছে। তেওঁ লগতে আগন্তুক নিৰ্বাচনত যাতে সকলোৱে মুক্ত আৰু ন্যায্য পৰিৱেশত ভোটদান কৰিবলৈ সক্ষম হয়, তাৰ বাবেও আশা প্ৰকাশ কৰে।
উল্লেখ্য যে, লোকসভা নিৰ্বাচনলৈ মাত্ৰ কেইটামান দিন বাকী থকা অৱস্থাত যোৱা ২১ মাৰ্চত দিল্লী সুৰা নীতিৰ গোচৰত কেন্দ্ৰীয় তদন্তকাৰী সংস্থা এনফ’ৰ্চমেণ্ট ডাইৰেক্টৰেটে গ্ৰেপ্তাৰ কৰিছিল অৰবিন্দ কেজৰিৱালক। বৰ্তমান তেওঁ তদন্তকাৰী সংস্থাটোৰ জিম্মাত আছে।
ইফালে, একে সময়তে কংগ্ৰেছে তুলিছে আন এক অভিযোগ। দলটোৱে অভিযোগ কৰা মতে আয়কৰ বিভাগে তেওঁলোকৰ বেংক একাউণ্ট ছীল কৰি দিয়াৰ ফলত সংসদীয় নিৰ্বাচনত যুঁজিবলৈ তেওঁলোকৰ হাতত কোনো ধন নাই।
এই দুই বিষয়ত আমেৰিকা আৰু জাৰ্মানীৰ বিদেশ মন্ত্ৰালয়ৰ মুখপাত্ৰই ৰাজহুৱাকৈ প্ৰতিক্ৰিয়া প্ৰকাশ কৰাৰ পিছত ভাৰতে দউয়োখন দেশৰ এজনকৈ জ্যেষ্ঠ কূটনীতিবিদক তলৱ কৰি দেশদুখনৰ এই মন্তব্যক ভাৰতৰ আভ্যন্তৰীণ বিষয়ত প্ৰকাশ্য হস্তক্ষেপ বুলি অভিহিত কৰে।
