বলীউদৰ এগৰাকী অতি জনপ্ৰিয় তাৰকা হৃত্বিক ৰোশনৰ বিষয়ে সকলোৱে জানে। ভাল ডেন্সাৰ তথা অভিনেতা হিচাপে যুৱ প্ৰজন্মৰ অতি প্ৰিয় এইগৰাকী অভিনেতা।
কিন্তু মানুহ হিচাপেও তেওঁ এগৰাকী বিশাল মনৰ অধিকাৰী। প্ৰতিভাৱান তৰুণ প্ৰজন্মৰ প্ৰতি তেওঁ বিশেষ আগ্ৰহী।
শেহতীয়াকৈ এগৰাকী ২০ বছৰীয়া তৰুণৰ সপোন পূৰণৰ বাটত আশীৰ্বাদৰ হাত আগবঢ়ালে হৃত্বিকে।
উদীয়মান এগৰাকী বেলে ডেন্সাৰৰ প্ৰশিক্ষণৰ বাবে ৩লাখ টকাৰ বিত্তীয় সাহায্য আগবঢ়ালে অভিনেতাগৰাকীয়ে যাতে তেওঁ লণ্ডনলৈ গৈ এখন বেৱে স্কুলত প্ৰশিক্ষণ গ্ৰহণ কৰিব পাৰে।
দিল্লীৰ বিকাশ পুৰীৰ বাসিন্দা কামাল সিঙৰ বাবে নিজৰ সংস্থা এইচআৰএক্স ফিল্মছৰ জৰিয়তে তাৰকাগৰাকীয়ে এই সাহায্য আগবঢ়ায়।
এতিয়া কামালে দ্য ইংলিছ নেশ্যনেল বেলে স্কুল অফ লণ্ডনত নামভৰ্তি কৰিব পাৰিব।
বিত্ত সাহায্য প্ৰদানকাৰী প্লেটফৰ্ম কেট্টোত কামালে তেওঁৰ সমস্যাৰ কথা জনাইছিল।
কামালে লিখিছিল,’’চাৰি বছৰ পূৰ্বে মই কোনোদিন বেলেৰ নামো শুনা নাছিলো। মোৰ পিতৃ এগৰাকী ৰিক্সাচালক আৰু মই স্থানীয় এখন চৰকাৰী স্কুলত অধ্যয়ন কৰি সকলো সময়তে নৃত্য কৰাৰ কথাকে মনত ভাৱো। ভাগ্যৰ ফলত মই দিল্লীত এখন নৃত্যৰ স্কুল চলোৱা মেছেৰাট্ৰো ফাৰ্ণাণ্ডো আগুইয়েৰৰ নৃত্যুৰ ক্লাছত যোগ দিও। তাতেই বেলে কাক কয় জানিব পাৰো।‘’
নিজৰ সাধনাৰ বলত কামালে প্ৰথম ভাৰতীয় ডেন্সাৰ হিচাপে লণ্ডনৰ দ্য ইংলিছ নেশ্যনেল বেলে স্কুলৰ পৰা এবছৰৰ পেছাদাৰী প্ৰশিক্ষণ কাৰ্যসূচীত যোগ দিয়াৰ সুযোগ লাভ কৰিছে।
প্ৰশিক্ষণৰ শেষত তেওঁ সেই গ্ৰুপত বেলে ডেন্সাৰ হিচাপে নচাৰ সুযোগ পাব, লগতে মাহিলী দৰমহা লাভ কৰিব। কিন্তু ইংলেণ্ডলৈ যোৱা তথা তাত এবছৰ থকা-খোৱাৰ ব্যৱস্থাৰ বাবে যি টকাৰ প্ৰয়েজন সেয়া এগৰাকী ৰিক্সাচালক সন্তান হিচাপে তেওঁৰ নাই।
কামালৰ এই কথা হৃত্বিকে গম পোৱাৰ পাছতেই তেওঁ আগুৱাই আহি কামালৰ কাষত থিয় দিয়ে। ইতিমধ্যে কামালৰ একাউন্টত সেই প্ৰয়োজনীয় ৩লাখ টকা জমা হৈছে।
কামালৰ গুৰু মেছেৰাট্ৰো ফাৰ্ণাণ্ডো আগুইয়েৰে ইনষ্টাগ্ৰামত এই কথা সদৰী কৰিছে। এনেদৰে সহায় লাভ কৰি কামালে হৃত্বিকৰ প্ৰতি ধন্যবাদৰ ভাষা হেৰুৱাই পেলাইছে।
