ওদালগুৰিত বৃহৎ পৰিমাণৰ অস্ত্ৰ-শস্ত্ৰ আৰু গোলাবাৰুদ উদ্ধাৰ
অসম-অৰুণাচল প্ৰদেশৰ সীমান্তৰ কাষত ওদালগুৰিৰ মাজবাট অঞ্চলৰ পৰা অসম আৰক্ষীয়ে আজি উদ্ধাৰ কৰিছে বৃহৎ পৰিমাণৰ অস্ত্ৰ-শস্ত্ৰ আৰু গোলাবাৰুদ।
বাতৰি অনুসৰি, নিৰ্দিষ্ট তথ্যৰ আধাৰত ওদালগুৰি আৰক্ষীৰ এটা দলে মাজবাট আৰক্ষী থানাৰ অন্তৰ্গত চিকাৰিডাংগা অঞ্চলৰ ওচৰত অভিযান আৰম্ভ কৰে।
অভিযানৰ সময়ত আৰক্ষীয়ে জংঘলত পুতি থোৱা বৃহৎ পৰিমাণৰ অস্ত্ৰ-শস্ত্ৰ আৰু গোলাবাৰুদ উদ্ধাৰ কৰে।
অভিযানকাৰী আৰক্ষীৰ দলটোৱে অঞ্চলটোৰ পৰা ৩ টা একে ৰাইফল, ৬ টা মেগজিন আৰু ৬২০ ৰাউণ্ড গুলীৰ লগতে আন কিছু গোলাবাৰুদ উদ্ধাৰ কৰে।
উদ্ধাৰ হোৱা সামগ্ৰীসমূহ কোনো উগ্ৰপন্থী সংগঠনৰ আছিল বুলি প্ৰায় নিশ্চিত হৈছে যদিও প্ৰকৃততে কোন সংগঠনে এই যুদ্ধাস্ত্ৰ সমূহ লুকুৱাই ৰাখিছিল সেয়া স্পষ্ট হোৱা নাই।
ইতিমধ্যে এই সন্দৰ্ভত তথ্য উদঘাটনৰ বাবে আৰক্ষীয়ে তদন্ত আৰম্ভ কৰিছে বুলি জানিবলৈ দিছে।