কৰ্মসংস্থাপনৰ ওপৰত এক ডাঙৰ আঘাত! আমেৰিকাৰ কম্পিউটাৰ চিপ নিৰ্মাতা কোম্পানী ইণ্টেলে খৰচ কমাবলৈ ১৮ হাজাৰ কৰ্মচাৰীক চাকৰিৰ পৰা বৰ্খাস্ত কৰাৰ পৰিকল্পনা কৰিছে।
তথ্য প্ৰযুক্তি উদ্যোগৰ সুপৰিচিত কোম্পানী ইণ্টেলে দাবী কৰিছে যে শেহতীয়াকৈ কোম্পানীটোৱে লোকচানৰ সন্মুখীন হৈছে, সেয়েহে ১৫ শতাংশ কৰ্মশক্তিক চাকৰিৰ পৰা বৰ্খাস্ত কৰাৰ সিদ্ধান্ত লোৱা হৈছে।
একে সময়তে ইজৰাইলত নিৰ্মাণ হ’ব বুলি পূৰ্বে ঘোষণা কৰা কাৰখানাটো বন্ধ কৰাৰ সিদ্ধান্ত লৈছে কোম্পানীটোৱে। প্ৰসংগক্ৰমে সমগ্ৰ দেশৰ কেইবাটাও বৃহৎ কোম্পানীয়ে শেহতীয়া বিগত সময়ছোৱাত কৰ্মচাৰীক চাকৰিৰ পৰা বৰ্খাস্ত কৰিছে। এইবাৰ ইণ্টেলেও সেই পথত আগবাঢ়িছে, যিটো সমগ্ৰ বিশ্বৰ কৰ্ম সংস্থাটোৰ বাবে এক ডাঙৰ আঘাত বুলি বিবেচিত হৈছে।
সংবাদ সংস্থাৰ সূত্ৰ অনুসৰি যোৱা ৩ মাহত কোম্পানীটোৱে ১.৬ বিলিয়ন ডলাৰ লোকচান কৰিছে। কোম্পানীটোৰ মুখ্য কাৰ্যবাহী পেট গেলচিংগাৰে কয় যে এই নতুন প্ৰযুক্তি বিশেষভাৱে সফল হোৱা নাই। আনকি কৃত্ৰিম বুদ্ধিমত্তা থকা পিচি সামগ্ৰীয়েও বিশেষ সফলতা লাভ কৰা নাই। ফলত লোকচানৰ পৰিসংখ্যা বৃদ্ধি পাইছে। সেয়েহে আকাৰ হ্ৰাস কৰাৰ ডাঙৰ সিদ্ধান্ত।
২০২৩ চনত ইণ্টেলৰ মুঠ কৰ্মশক্তি আছিল ১,২৪,৮০০। এনে পৰিস্থিতিত ১৮ হাজাৰ কৰ্মচাৰীক চাকৰিৰ পৰা বৰ্খাস্ত কৰাৰ সিদ্ধান্তই কৰ্মচাৰীসকলৰ মাজত হুলস্থুলৰ সৃষ্টি কৰিছে। অৱশ্যে তালিকাত কোন কোন আছে সেয়া এতিয়াও স্পষ্ট হোৱা নাই।
উল্লেখ্য যে, তথ্য প্ৰযুক্তি জগতৰ এটা কোম্পানী ইণ্টেল। ১৯৬৮ চনত পদাৰ্থবিজ্ঞানী ৰবাৰ্ট নয়চ আৰু ৰসায়নবিদ গৰ্ডন মূৰে এই কোম্পানীটো গঠন কৰিছিল। সংস্থাটোৰ মতে, এই কঠিন পদক্ষেপটো হৈছে লোকচানৰ সন্মুখীন হোৱা বজাৰখনৰ সৈতে ভাৰসাম্য ৰক্ষা কৰা।
