ডিমৌত পঞ্চম শ্ৰেণীৰ ছাত্ৰীৰ জাপানীজ এনকেফেলাইটিছত আক্ৰান্ত হৈ মৃত্যু
আজি পুৱতি নিশা শিৱসাগৰ জিলাৰ ডিমৌ ৰাইচাইত এগৰাকী পঞ্চম শ্ৰেণীৰ ছাত্ৰী জাপানীজ এনকেফেলাইটিছ ৰোগত অাক্ৰান্ত হৈ মৃত্যু হয়।
পুৱতি নিশা প্ৰায় ৪ বজাত শোৱাপাটীতে মৃত্যুক সাবটি লয় ডিমৌ ৰাইচাই গাঁৱৰ চুনু মুৰাৰীৰ ১০ বছৰীয়া কন্যা সোণমণি বাউৰীয়ে।
উল্লেখযোগ্য যে ২০ দিন পূৰ্বে ডিমৌ আদৰ্শ চিকিৎসালয়ত চিকিৎসা গ্ৰহণ কৰি আৰোগ্য লাভ নকৰাত সোণমনি বাউৰীক উন্নত চিকিৎসাৰ বাবে পৰিয়ালৰ লোকে ডিব্ৰুগড় অসম মেডিকেল কলেজত ভৰ্তি কৰাইছিল। কিন্তু বৃহস্পতিবাৰে মেডিকেলৰ পৰা ঘৰলৈ আহি দুদিনৰ পিছতে পুনৰ অসুস্থ হৈ পৰে কিশোৰীগৰাকী।
আৰি শুকুৰবাৰে নিশা প্ৰায় ২ বজাত অসুস্থ হৈ পৰা ছাত্ৰীগৰাকীয়ে আজি পুৱাতে কৰুণভাৱে শোৱাপাটীতে মৃত্যুক আকোঁৱালি লয়।
আনহাতে স্থানীয় ৰাইজে চিকিৎসকৰ গাফিলতিৰ বাবেই সোনমণি বাউৰীয়ে মৃত্যুক সাবটি লোৱা বুলি অভিযোগ উত্থাপন কৰে।
আজি ডিমৌ কোঁৱৰ দিহিঙীয়া প্ৰাথমিক বিদ্যালয়ৰ পঞ্চম শ্ৰেণীত অধ্যয়নৰত ছাত্ৰীগৰাকীৰ মৃত্যুত মৰ্মাহত সহপাঠীসকল আৰু ৰাইচাই গাঁৱৰ স্থানীয় লোকসকলে সোনমণিৰ মৃতদেহ লৈ গাওঁখনত এক প্ৰতিবাদী সমদল উলিয়াই স্বাস্থ্য বিভাগৰ বিৰুদ্ধে প্ৰতিবাদ কৰে।
সমদলকাৰীসকলে ‘স্বাস্থ্য মন্ত্ৰী মুর্দাবাদ, স্বাস্থ্য বিভাগ হায় হায়, ৰাইচাই বাসীক এনফেলাইটিছৰ পৰা ৰক্ষা কৰক, এনফেলাইটিছ বেজী দিয়াৰ ব্যৱস্থা কৰক’ আদি বিভিন্ন প্ৰতিবাদী শ্ল’গান দিয়ে।