নাগালেণ্ড ক্ৰিকেট দলৰ অধিনায়ক ৰংছেন জনাথনে লিষ্ট এ কেৰিয়াৰত অৰ্জন কৰা প্ৰথমটো শতকৰ কোনো মূল্য নাই বুলি বি চি চি আয়ে ঘোষণা কৰাৰ পিছতে ক্ষুভিত হৈ পৰিছে ক্ৰিকেটাৰ গৰাকী।
বিজয় হাজাৰে ট্ৰফীত মণিপুৰৰ বিৰুদ্ধে খেলা মেচখনত নাগালেণ্ডৰ অধিনায়ক জনাথনে তিনি নম্বৰত বেটিং কৰি শতক অৰ্জন কৰে। কি্ন্তু মেচখন বৰষুণৰ বাবে আধাতে বাতিল কৰাত জনাথনে অৰ্জন কৰা শতকটো Invalid (অবৈধ) বুলি জনায় বি চি চি আয়ে।
বি চি চি আইৰ এই সিদ্ধান্তক সহজভাৱে মানি ল’ব পৰা নাই নাগালেণ্ডৰ অধিনায়ক গৰাকীয়ে। তেওঁ এয়া অত্যন্ত বেদনাদায়ক তথা দুঃখিত বুলিও উল্লেখ কৰে।
তেওঁ কয়, ‘মেচখন ৬০ শতাংশ সম্পূৰ্ণ হৈছিল। মেচখন বাতিলৰ সিদ্ধান্ত মই বুজিছো, কিন্তু মেচৰ পৰিনাম নোলোৱা বাবেই খেলুৱৈয়ে গঢ়া ৰেকৰ্ড কাঢ়ি লোৱা হ’ল নেকি’?
তেওঁ লগতে কয়, ‘খেলুৱৈয়ে মেচৰ বাবে গোটেই বছৰটো প্ৰশিক্ষণ, কষ্ট কৰাৰ পিছত যদি কোনো খেলুৱৈয়ে ছিজনৰ প্ৰথম মেচত এনেধৰণৰ অনবদ্য ৰেকৰ্ড গঢ়ে আৰু পাছত সেই ৰেকৰ্ডৰ মান্যতা নোহোৱা কৰি দিয়া হয় তেতিয়া খেলুৱৈ গৰাকী দুঃখিত হোৱাটো স্বাভাৱিক’।
ইফালে কিয় এই ধৰণৰ সিদ্ধান্ত লোৱা হ’ল সেই বিষয়ে জানিবলৈ জনাথনে বি চি চি আইলৈ পত্ৰ লিখা বুলিও জানিবলৈ দিয়ে। কিন্তু এই পৰ্যন্ত বি চি চি আয়ে জনাথনৰ পত্ৰৰ উত্তৰ দিয়া নাই।
