পুনৰ ছুটকেছৰ পৰা উদ্ধাৰ হৈছে এগৰাকী মহিলাৰ মৃতদেহ। বেংগালুৰুৰ হুলিমাভু অঞ্চলত সংঘটিত এই কাণ্ডত নিহত হোৱা গৌৰী অনিল সাম্বেকাৰ (৩২) নামৰ এগৰাকী মহিলাক তেওঁৰ স্বামী ৰাকেশ সাম্বেকাৰে হত্যা কৰাৰ অভিযোগ উত্থাপন হৈছে। আৰক্ষীয়ে জনোৱা মতে, হত্যাকাণ্ডৰ পিছত ৰাকেশ পুনেলৈ পলায়ন কৰে। কিন্তু তাৰ পৰাই তেওঁক গ্ৰেপ্তাৰ কৰা হয়।
আৰক্ষীয়ে জনোৱা মতে, হত্যাকাণ্ডৰ পিছত ৰাকেশে নিজেই গৌৰীৰ পৰিয়ালৰ সৈতে ফোনযোগে যোগাযোগ কৰি হত্যাকাণ্ডৰ কথা স্বীকাৰ কৰে। মহাৰাষ্ট্ৰ আৰক্ষীৰ পৰা তথ্য লাভ কৰাৰ পিছত বেংগালুৰু আৰক্ষীয়ে সেই স্থানত উপস্থিত হৈ তদন্ত আৰম্ভ কৰে।
বেংগালুৰু আৰক্ষীয়ে জনোৱা মতে, বৃহস্পতিবাৰে বিয়লি প্ৰায় ৫:৩০ বজাত নিয়ন্ত্ৰণ কক্ষত ফোন আহিছিল, য’ত সন্দেহজনক চিপ লোৱা ঘটনাৰ খবৰ দিয়া হৈছিল। ঘটনাস্থলীত আৰক্ষী উপস্থিত হোৱাৰ লগে লগে ঘৰৰ দুৱাৰখন বাহিৰৰ পৰা তলা লগোৱা দেখা পায়। তাৰ পাছত দুৱাৰখন ভাঙি সোমাওঁতে বাথৰুমত এটা ছুটকেছ পৰি থকা দেখে।
ফৰেনছিক দলটোৱে যেতিয়া ছুটকেছটো খুলিলে তেতিয়া ভিতৰত এগৰাকী মহিলাৰ মৃতদেহ উদ্ধাৰ কৰে। আৰক্ষীয়ে জনোৱা মতে, সাধাৰণতে ছুটকেছত মৃতদেহ ৰখাৰ ক্ষেত্ৰত মৃতদেহটো কটা অৱস্থাত থাকে। কিন্তু এই ঘটনাত গুৰুতৰভাৱে আঘাত পোৱাৰ লক্ষণ দেখা গ’লেও মৃতদেহটো অক্ষত অৱস্থাত আছিল।
তদন্তকাৰীয়ে জনোৱা মতে, আঘাতৰ প্ৰকৃতি আৰু মৃত্যুৰ সঠিক কাৰণ মৰণোত্তৰ পৰীক্ষাৰ পিছতহে জানিব পৰা যাব।
প্ৰথম অৱস্থাত আৰক্ষীয়ে মৃতকৰ স্বামী ৰাকেশ সাম্বেকাৰক বিচাৰি গৈ একো নাপালে। পিছত তেওঁৰ ফোনটো ট্ৰেক কৰাৰ পিছত পোহৰলৈ আহিল যে তেওঁ পুনেলৈ পলাই গৈছে। অৱশেষত বেংগালুৰু আৰু পুনে আৰক্ষীৰ সমন্বিত অভিযানৰ জৰিয়তে তেওঁক গ্ৰেপ্তাৰ কৰা হয়।
আৰক্ষীয়ে জনোৱা মতে, দুবছৰ পূৰ্বে গৌৰী আৰু ৰাকেশৰ বিয়া হৈছিল। দুয়োজনেই মহাৰাষ্ট্ৰৰ বাসিন্দা। দুমাহ আগতে নতুন কামৰ সন্ধানত বাংগালুৰুলৈ আহিছিল। ৰাকেশে এটা আই টি কোম্পানীত প্ৰজেক্ট মেনেজাৰ হিচাপে কাম কৰিছিল। গৌৰী এগৰাকী গৃহিণী হৈ নতুন চাকৰি বিচাৰি আছিল।
বুধবাৰে নিশা তেওঁলোকৰ মাজত কিবা এটা কথাত কাজিয়া আৰম্ভ হয়। সেই মুহূৰ্তত ৰাকেশে খঙতে পাকঘৰৰ পৰা দা এখন আনি পত্নীক হত্যা কৰে। আৰক্ষীয়ে জনোৱা মতে, এই কাজিয়া কি বিষয়ত হৈছিল সেই বিষয়ে জানিবলৈ ৰাকেশক সোধা-পোছা কৰি থকা হৈছে।
