সমগ্ৰ অসমক লজ্জানত কৰা এক জঘন্য ধৰ্ষণকাণ্ড সংঘটিত কৰিলে কোনো পাষণ্ডই। মাজুলীত লুলুপ ব্যক্তিৰ ধৰ্ষণৰ বলি হ’ল গৱেষণা কৰিবলৈ অহা হাইদৰাবাদৰ গৱেষক ছাত্ৰী।
জানিব পৰা মতে, বৃহস্পতিবাৰে মাজুলীৰ অফলামুখ ঘাটৰ পৰা নিমাতী ঘাটলৈ যোৱা ফেৰীৰ বাবে গৈ থকা অৱস্থাত ছাত্ৰীগৰাকীৰ শৰীৰত ফটা–ছিটা কাপোৰ আৰু আঘাতৰ চিন লক্ষ্য কৰি সহযাত্ৰী সকলে দুৰ্দশাগ্ৰস্ত ছাত্ৰীগৰাকীক সোধ–পোচ কৰে।
ছাত্ৰীগৰাকীয়ে কয় যে তেওঁ গৱেষণাৰ কাম শেষ কৰি নিমাতীঘাটলৈ যোৱা উদ্দেশ্যেৰে অফলামুখৰ ফেৰী ঘাটলৈ এখন ই ৰিক্সাৰে আহি আছিল। কিন্তু আগৰ ৰাস্তাটোৰ অৱস্থা ভাল নোহোৱাৰ বাবে চালকজনে অফলামুখ ঘাট পাবলৈ কিছুদূৰ থাকোঁতেই যাত্ৰীসকল নমাই দি সেইখিনি খোজ কাঢ়ি যাবলৈ কয়।
কিন্তু ই ৰিক্সাৰ পৰা নামি হাবিতলীয়া ৰাস্তাটোৰে গৈ থকাৰ অৱস্থাতে সেই ই-ৰিক্সাখনত অহা এগৰাকী সহযাত্ৰীয়ে তেওঁক হঠাতে জংঘলৰ মাজলৈ টানি নি উপৰ্যুপৰি ধৰ্ষণ কৰি সেই স্থানৰ পৰা পলাই যায়।
ইয়াৰ পিছতে মুমূৰ্ষ অৱস্থাত যুৱতীগৰাকীক ফেৰীৰ যাত্ৰীসকলে প্ৰত্যক্ষ কৰে আৰু যাত্ৰীৰ সোধ–পোচত ধৰ্ষণ কাণ্ডৰ কথা পোহৰলৈ আহে। লগে লগে এগৰাকী মহিলাই এযোৰ কাপোৰ কিনি আনি বিধস্ত যুৱতীগৰাকীক পিন্ধিবলৈ দিয়ে।
ঘটনা পোহৰলৈ অহাৰ লগে লগে স্থানীয় ৰাইজ আৰু যাত্ৰীসকলৰ মাজৰ পৰা ডাইল ১০০ লৈ ফোন কৰে যদিও সময়তে আৰক্ষী সেই স্থানত উপস্থিত নহ’ল। অৱশেষত হতাশ হৈ এজন ব্যক্তিয়ে নিজৰ মটৰ চাইকেলত যুৱতীগৰাকীক আৰক্ষী থানাৰ অভিমুখে লৈ যায় আৰু বাটতে আৰক্ষীৰ দলৰ মুখা-মুখী হয়।
জানিব পৰা মতে, বতৰ্মান ভুক্তভোগী গৱেষক ছাত্ৰীগৰাকী মাজুলীৰ বঙাইগাঁও আৰক্ষী থানাৰ জিম্মাত আছে।
ইয়াৰ পূৰ্বে ছাত্ৰীগৰাকীক সমবেত ব্যক্তিসকলৰ এজনে নিজৰ মোবাইল ফোনটো দি তেওঁ নিজৰ ঘৰলৈ ফোন কৰি সমগ্ৰ খণ্ডটোৰ বিষয়ে অৱগত কৰাত সহায় কৰে।
স্থানীয় লোকসকলে দাবী কৰা মতে, সময়মতে আৰক্ষী আহি পালে দোষীক ধৰা পৰিলেহেঁতেন। যিহেতু দোষী ইতিমধ্যে সেই স্থানৰ পৰা পলাই গৈছে, এতিয়া তেওঁক ধৰি ৰখাটো এক কষ্টকৰ কাম হ’ব। লগতে, আৰক্ষী পলমকৈ অহাৰ ঘটনাক ধিক্কাৰ দিছে স্থানীয়ে ৰাইজে।
দুখজনক কথাটো হ’ল যে সত্ৰ নগৰী বুলি পবিত্ৰ জ্ঞান কৰা মাজুলীত এনে এটা জঘন্য অপৰাধ সংঘটিত হোৱাটো অসমৰ বাবে এক লজ্জাজনক বিষয়।
মাজুলীলৈ প্ৰতিবছৰে গৱেষণাৰ কামত বা ফুৰিবলৈ দেশ–বিদেশৰ পৰা হাজাৰ হাজাৰ পৰ্যটক আহে। এতিয়া এই ঘটনাৰ পিছত ভৱিষ্যতে মাজুলীলৈ আহিবলগা পৰ্যটক সকলে সুৰক্ষিত অনুভৱ কৰিবনে? এই প্ৰশ্নই এতিয়া উদ্ৰেক হৈছে সচেতন ৰাইজৰ মনত।
