সততে হিন্দুত্ববাদী এজেণ্ডা প্ৰচাৰ কৰা দল হিচাপে খ্যাত বিজেপিৰ সপক্ষে ৰাজ্যখনৰ সংখ্যাগৰিষ্ঠ মেঘালয়ৰ খ্ৰীষ্টান ভোটাৰক প্ৰলোভিত কৰাৰ প্ৰয়াসত দলটোৰ ৰাজ্যিক সভাপতিগৰাকীয়ে আগবঢ়াইছে এক গুৰুত্বপূৰ্ণ মন্তব্য।
মেঘালয় বিজেপিৰ সভাপতি আৰ্নেষ্ট মাউৰীয়ে কয় যে তেওঁ যদিও গেৰুৱা দলটোৰ সদস্য, তথাপিও তেওঁৰ খাদ্যাভ্যাসৰ ক্ষেত্ৰত দল কেতিয়াও বাধা হৈ পৰা নাই। তেওঁ কয় যে গো মাংস ভক্ষণ কৰাৰ ক্ষেত্ৰত তেওঁক বিজেপি দলে কেতিয়াও বাধা প্ৰদান কৰা নাই।
সংবাদ মাধ্যমৰ সৈতে এক সাক্ষাৎকাৰত মাউৰীয়ে কয় যে কেন্দ্ৰত বিজেপি ক্ষমতালৈ অহাৰ পিছৰে পৰা কোনো গীৰ্জাৰ ওপৰত কোনো ধৰণৰ আক্ৰমণ হোৱা নাই আৰু দলটোৱে গো-মাংস খোৱাৰ ক্ষেত্ৰত কোনো বাধা আৰোপ নকৰে।
সাংবাদিকৰ এক প্ৰশ্নৰ উত্তৰত মাউৰীয়ে কয় যে প্ৰধানকৈ খ্ৰীষ্টান ধৰ্ম অনুসৰণ কৰা মেঘালয়ৰ খিলঞ্জীয়া লোকসকলে গো-মাংস নিষেধাজ্ঞা, নাগৰিকত্ব সংশোধনী আইন আৰু অন্যান্য বিষয়ত বিজেপিৰ বিৰুদ্ধে কঠোৰ স্থিতি গ্ৰহণ কৰিবলৈ সদায় সাজু।
মাউৰীয়ে লগতে বিজেপিয়ে আগন্তুক মেঘালয় বিধানসভা নিৰ্বাচনত ভাল ফলাফল প্ৰদৰ্শন কৰিব বুলি আস্থা প্ৰকাশ কৰে। “মই আপোনালোকক আশ্বাস দিছো যে এইবাৰ মেঘালয়ৰ জনসাধাৰণ বিজেপিৰ লগত আছে। সেয়া আপোনালোকে ২ মাৰ্চত দেখা পাব।”– তেওঁ কয়।
“এইবাৰ ৰাজ্যৰ সম্পূৰ্ণ ৬০ খন আসনৰ বাবেই আমি প্ৰাৰ্থী প্ৰক্ষেপ কৰিছো। আমি ভাল ফল আশা কৰিছো। দুৰ্নীতিত নিমজ্জিত নোহোৱা এই দলকেই মেঘালয়ৰ জনসাধাৰণে পুনৰ নিৰ্বাচিত কৰিব।”— আত্মবিশ্বাসী মাউৰীয়ে লগতে কয়।
