মোৰ কোনো ব্যক্তিগত স্বাৰ্থ নাই, ইথানল নীতিক লৈ গভীৰ ষড়যন্ত্ৰ চলিছে: নিতিন গাডকাৰী

কেন্দ্ৰীয় পথ পৰিবহণ আৰু ঘাইপথ মন্ত্ৰী নিতিন গাডকাৰীয়ে কেন্দ্ৰ চৰকাৰৰ ইথানল মিশ্ৰণ কাৰ্যসূচীক জোৰদাৰভাৱে সমৰ্থন কৰিছে। তেওঁ এই নীতিক লৈ উত্থাপিত ব্যক্তিগত স্বাৰ্থ থকাৰ সকলো অভিযোগ সম্পূৰ্ণৰূপে নাকচ কৰাৰ লগতে ইয়াৰ ফলত বাহনৰ ক্ষতি হোৱাৰ দাবীও খাৰিজ কৰে। সমালোচকসকলক প্ৰত্যাহ্বান জনাই মন্ত্ৰীগৰাকীয়ে কয় যে ই২০ ইন্ধনৰ বাবে কোনো পেট্ৰল চালিত বাহন ক্ষতিগ্ৰস্ত হোৱাৰ প্ৰমাণ থাকিলে তেওঁলোকে দাঙি ধৰক। তেওঁ স্পষ্ট কৰি দিয়ে যে এই পদক্ষেপৰ মূল উদ্দেশ্য হৈছে দেশৰ ইন্ধন আমদানি হ্ৰাস কৰা, স্বচ্ছ ইন্ধনৰ প্ৰসাৰ কৰা আৰু কৃষকৰ উপাৰ্জন বৃদ্ধি কৰা।

 ইণ্ডিয়া টুডে টিভিৰ সৈতে হোৱা এক আছুতীয়া সাক্ষাৎকাৰত গাডকাৰীয়ে ইথানল কাৰ্যসূচীত তেওঁৰ কোনো ব্যক্তিগত লাভালাভ থকাৰ কথা অস্বীকাৰ কৰে। তেওঁ কয় যে তেওঁৰ পৰিয়ালৰ চেনিৰ ব্যৱসায় চৰকাৰৰ ইথানল নীতি অহাৰ বহুত আগৰ পৰাই চলি আছে আৰু ইথানল উৎপাদনত তেওঁৰ অংশ অতি নগণ্য। তেওঁ উল্লেখ কৰে যে এই ইথানল নীতিৰ পৰা তেওঁ একো পোৱা নাই আৰু সমগ্ৰ দেশৰ উৎপাদনত তেওঁৰ পৰিয়ালৰ অংশমাত্ৰ ০.০৭ শতাংশহে। ইমান কম অংশীদাৰিত্ব থকা এজন ব্যক্তিয়ে নিজৰ লাভৰ বাবে দেশৰ ইথানল নীতিক প্ৰভাৱিত কৰাটো কোনোমতেই সম্ভৱ নহয় বুলি তেওঁ মত প্ৰকাশ কৰে।

 মন্ত্ৰীগৰাকীয়ে সদৰী কৰে যে ভাৰতত বৰ্তমান প্ৰায় ৫৫০ টা ইথানল উৎপাদনকাৰী গোটৰ জৰিয়তে বাৰ্ষিক প্ৰায় ১৫০০ কোটি লিটাৰ ইথানল উৎপাদন কৰা হয়। তেওঁ কেৱল ইথানলৰ কথাই কোৱা নাই, বৰঞ্চ সদায় বিভিন্ন বিকল্প ইন্ধনৰ ব্যৱহাৰৰ সপক্ষে কাম কৰি আহিছে যাতে খাৰুৱা তেলৰ ওপৰত দেশৰ নিৰ্ভৰশীলতা কমে আৰু কৃষকসকল উপকৃত হ’ব পাৰে। তেওঁ লগতে কয় যে এই নীতি তেওঁ অকলশৰে লোৱা নাই, বৰঞ্চ পেট্ৰলিয়াম মন্ত্ৰালয়, কেবিনেট আৰু বৈজ্ঞানিক গৱেষণাৰ পাছত সকলোৰে সৈতে আলোচনা কৰিহে এই সিদ্ধান্ত গ্ৰহণ কৰা হৈছে।

 ইথানলযুক্ত ইন্ধনে বাহনৰ ক্ষতি কৰে বুলি একাংশই কৰা দাবীৰ উত্তৰত গাডকাৰীয়ে কয় যে যদি কাৰোবাৰ বাহন ইথানলৰ বাবে নষ্ট হৈছে, তেন্তে তেওঁলোকে ডীলাৰ বা পৰিবহণ মন্ত্ৰালয়ৰ ওচৰত অভিযোগ দাখিল কৰিব পাৰে আৰু চৰকাৰে ইয়াৰ তদন্ত কৰি সকাহ দিব। তেওঁ কয় যে মাৰুতি সুজুকি, টয়োটা, টাটা মটৰ্ছ আৰু মহিন্দ্ৰাৰ দৰে ডাঙৰ কোম্পানীসমূহে ইথানলৰ বাবে বাহন নষ্ট হোৱাৰ কোনো অভিযোগ কৰা নাই। অলপতে টয়োটা গাড়ী এখনৰ ক্ষেত্ৰত হোৱা বিসংগতিৰ তদন্তত ইথানলৰ সলনি পানীতহে ভেজাল থকাটো ধৰা পৰিছিল। এই সমগ্ৰ বিতৰ্কক তেওঁক বদনাম কৰাৰ এক ৰাজনৈতিক ষড়যন্ত্ৰ বুলি অভিহিত কৰি তেওঁ কয় যে আমেৰিকা, ব্ৰাজিল, জাপান, জাৰ্মানী, থাইলেণ্ড আৰু চুইডেন আদি দেশত ইতিমধ্যে ইথানল সফলতাৰে ব্যৱহাৰ কৰা হৈছে আৰু ভাৰতেও এক গোলকীয় পদ্ধতিহে অনুসৰণ কৰিছে।