আমেৰিকা যুক্তৰাষ্ট্ৰৰ ৰাষ্ট্ৰপতি ডনাল্ড ট্ৰাম্পে ইৰানৰ সৈতে অলপতে হোৱা শান্তি চুক্তিখন বাতিল হোৱা বুলি ঘোষণা কৰিছে। তেওঁ ইৰানৰ নেতাসকলক তীব্ৰ ভাষাৰে কটাক্ষ কৰি তেওঁলোকক অতি বেয়া মানুহ বুলি অভিহিত কৰিছে। হাৰমুজ প্ৰণালীত তিনিখন ব্যৱসায়িক জাহাজৰ ওপৰত হোৱা আক্ৰমণৰ প্ৰতিশোধ ল‘বলৈ আমেৰিকাই ইৰানৰ ওপৰত নতুনকৈ আক্ৰমণ চলোৱাৰ কিছু সময়ৰ পিছতে ট্ৰাম্পে এই ডাঙৰ ঘোষণা কৰে। তুৰস্কত অনুষ্ঠিত হোৱা নাট’ সন্মিলনত তীব্ৰ ক্ষোভ প্ৰকাশ কৰি ট্ৰাম্পে কয় যে তেওঁ এতিয়া ইৰানৰ সৈতে কোনো ধৰণৰ সম্পৰ্ক ৰাখিব নিবিচাৰে।
মাত্ৰ তিনি সপ্তাহ পূৰ্বে ইৰানৰ সৈতে স্বাক্ষৰিত হোৱা বুজাবুজিৰ চুক্তিখনৰ বিষয়ে সোধাত ট্ৰাম্পে পোনপটীয়াকৈ কয় যে তেওঁৰ বাবে এই চুক্তি এতিয়া শেষ হৈ গৈছে আৰু তেওঁলোকৰ সৈতে কোনো লেনদেন কৰিবলৈ তেওঁ সাজু নহয়। ট্ৰাম্পৰ এই মন্তব্যৰ পিছতে বিশ্ব বজাৰত খাৰুৱা তেলৰ মূল্য ৩ শতাংশতকৈও অধিক বৃদ্ধি পাইছে। সমগ্ৰ বিশ্বৰ প্ৰায় ২০ শতাংশ ইন্ধন সৰবৰাহ হোৱা হাৰমুজ প্ৰণালীৰ ওপৰত নিজৰ আধিপত্য বিস্তাৰ কৰিবলৈ ইৰানে কৰা চেষ্টাৰ বাবেই দুয়োখন দেশৰ মাজত এই যুদ্ধ সদৃশ পৰিৱেশৰ সৃষ্টি হৈছে।
ইৰানৰ নেতৃত্বক তীব্ৰ আক্ৰমণ কৰি ট্ৰাম্পে কয় যে তেওঁলোক অতি হিংস্ৰ, পাগল আৰু মিছলীয়া মানুহ। তেওঁলোকৰ হাতত যদি পাৰমাণৱিক অস্ত্ৰ থাকিলহেঁতেন, তেন্তে তেওঁলোকে তাক নিশ্চয় ব্যৱহাৰ কৰিলেহেঁতেন। অৱশ্যে তেওঁ কয় যে দুয়োপক্ষৰ আলোচনাপন্থীসকলে কথা পাতি থাকিব পাৰে, কিন্তু তেওঁৰ মতে ই কেৱল সময়ৰ অপচয়হে হ’ব কিয়নো ইৰানৰ নেতাসকল বিশ্বাসৰ যোগ্য নহয়।
ইফালে ইৰানৰ সামৰিক ঘাটি, মিছাইল কেন্দ্ৰ আৰু বন্দৰসমূহক লক্ষ্য কৰি আমেৰিকাই এক বৃহৎ আক্ৰমণ চলাইছে। ইৰানৰ প্ৰাক্তন সৰ্বোচ্চ নেতা আয়াতুল্লাহ আলী খামেনেইৰ অন্ত্যেষ্টিক্ৰিয়াৰ অনুষ্ঠান চলি থকাৰ সময়তে এই আক্ৰমণসমূহ কৰা হৈছে, যিগৰাকী নেতাক যোৱা মাৰ্চ মাহত আমেৰিকা আৰু ইজৰাইলৰ যৌথ আক্ৰমণত হত্যা কৰা হৈছিল। আমেৰিকাৰ এই নতুন আক্ৰমণৰ ফলত ইৰানৰ বান্দাৰ আব্বাছ আৰু কিচম দ্বীপকে ধৰি কেইবাটাও অঞ্চলত প্ৰচণ্ড বিস্ফোৰণৰ শব্দ শুনা গৈছে আৰু সমগ্ৰ অঞ্চলটোত উত্তেজনা চৰম পৰ্যায়ত উপনীত হৈছে।
